Serchhip-ah Handholding Policy hnuaia thlaithar lei leh hralh dan tur zirhona neih a ni
Serchhip DC Pisapui Hall -a he hun hman ah hian Bawrhsap chuan Mizoram economy chawikanna tura thil pawimawh, kuthnathawktute dinhmun chawikanna tura sawrkar policy dinglai Handholding Policy kalpui tan a ni chu lawmawm a tih thu leh thlai thar lei leh hralh chungchang inzirtirna nei tura Mizoram Agriculture Marketing Board (MAMB) Member te an lo kal avangin lawmthu a sawi a. Mizorama kuthnathawktute leh loneitute dinhmun harsa taka an din mekna hmun atanga Ban-a kai chhuak turin he policy hi a tangkai hle dawn a ni, a ti. Serchhip DAMC in hmalakna an lo kalpui tawh dan thenkhat te Bawrhsap hian a tarlang a. DAMC chuan Serchhip District chhunga Office te zirchiangin thlai thar dahkhawmna tur Kudam leh Cold Storage an neih dan an thlithlai tih a sawi a. District Agriculture Office, District Horticulture Office, Supply Office leh Rural Development Department ten hmunhma an neih mek te chu thlai thar dahkhawmna tur hian a tangkai dawn tih Bawrhsap chuan a sawi bawk.
He hunah hian OSD to Minister, Agriculture and Farmers Welfare Department Dr. H.Saithantluanga chuan thlaithar lei leh hralh dan tur Scheme sawifiahin, he Scheme hnuaiah hian thlai thar thlan bik -Sawhthing, Aieng, Hmarcha leh Hmunphiah a awm thu leh heng thlai thlan bikah te hian Minimum Support Price pek an nih dan tur kalphung te a sawifiah a. MAMB-a Co-opted Member Isaac Lalremruata chuan kuthnathawktuten an thlai tharchhuahte man man zawka an hralh theihna turin Handholding Policy din a nih thu leh thlai thar lei leh hralh dan turte a sawifiah bawk.
He huna tarlan a nih danin Handholding Policy hnuaia thlai thlan bik chingtute chu Society ah an inziaklut anga. Heng Society-a inziaklut farmer te chuan thlai hrang hranga sawrkarin a bithliah Minimum Support Price an dawng thei dawn a ni. Sawhthing hi kg. ah Rs. 50 aia tlem lova farmer ten an hralh theihna turin ruamanna siam a ni a. Society member te hian an thlai thar-chhuah te hi Primary Collection Centre (thlai tharchhuah dahkhawmna) ah an dahkhawm ang a. Primary Collection Centre hi Society ten an duh dan leh remchanna hmunah an siam dawn a ni.
Primary Collection Centre atang hian Secondary Collection Centre-ah phurhkhawm leh a ni dawn a. Secondary Collection Centre hi District tinah hmun thum emaw, hmun li emaw theuh chauh siam a ni dawn a, he Centre atang hian Company ten thlaithar hi an leichhuak dawn a ni. Thlaithar te hi lilam tur a ni a, Company ten an chhanna hi sawrkarin a bituk zat (eg. Sawhthing kg ah 50) aia a tlem chuan a tlin lohna zat (balance) hi sawrkarin farmer te a pe thung dawn a ni.
Farmer te hian sawrkarin a bituk sak aia sanga hralhna an hmu a nih chuan zalen takin an duhna apiangah an thlai thar te hi an hralh thei dawn a. Minimum Support Price an dawn duh erawh chuan heng Society-ah hian an inziahluh a ngai dawn thung a ni.
He hunah hian District Agriculture Officer leh DAMC Member Secretary Lalchharliana te, District Horticulture Officer Lalrintluanga leh LRS &WC District Officer JH. Laldingliana te chuan an Department hnuaia an hmalak tawhna te an tarlang a. Serchhip chu Sawhthing ching tamna ber a nih thu leh ruahmanna siam sa baka chawpchilha ngaih-tuah ngai a tam dawna a hriat thu leh lo inpuah-chah lawk a ngaih thu te tarlan a ni a. Sawhthing chu tâm mah se, thar chhuah a tlahniam dawn lo nia an ngaih thu leh kuthnathawktute ding-chhuak tur mitthla chunga phur taka thawhpui an tul thu te pawh tarlan a ni bawk.
Comments
Post a Comment