Congress thalai ten chhui turin Lokayukta-ah thlen

Congress thalaite chuan Education Department hnuaia Samagra Siksha Mizoram leh Thar-thilthlentu Entrepreneurship and MSME Support Society (TiLi) in 'Project Intodelh Inzirtir a 2024-2025' atana thawhdunna an ziah a dik lo taka pawisa in siam chungchang chhui turin nimin khan Lokayukta-ah lehkha an thehlut.

Hemi chungchanga MPYCC in thuchhuah siama an tarlan danin July ni 1, 2024 khan Mizoram sawrkar Education Department hnuaia Samagra Shiksha Mizoram leh Tharthilthlentu Entrepreneirship and MSME Support Society (TiLi) te chuan'Project Intodelh Inzirtirna 2024-2025’ atan inremna (agreement) an ziah thu leh he inremnaa a in ziah ang chuan he project Fund hi Rs. 59,00,000/- a ni tih an sawi a. He Project hi an ruahman dan chuan sawrkar School 10, High School 5 leh Higher Secondary School 5 thlangin chunga School zirlai naupang te hnenah chuan Project Intodelh kalpui tur a ni tih an sawi a. He Project hi Central leh State Fund 90:10 pattern hmanga thawh tur niin cheng nuai 25chung lamah chuan Project guideline angin Tender chhuah thlapa project kalpuitu tur thlan tur a ni a, mahse he Project ah hian guideline in a phut angin Tender chhuah a ni lo tih an sawi.

MPYCC chuan he Project atana pawisa an release dan tur hi agreement-a an ziah ang chuan an fund hmuh atanga 40% chu First Installment-ah Mobilisation Advance atan project agreement sign hunah pek tur leh Second Installment 30% chu Resource Person ten training an pek vek hnu a pek leh tur niin Third Installment 30% chu Project zawh vek tawh hnua pek tur a ni tih an sawi a. Dan in a phut anga Tender leh Quotation pawh chhuah lova project lian leh pawi-mawh tak, sum tam tak awmna Advance Payment Rs. 23,60,000 lai an inpe chu a dik lovin induhsakna uchuak tak niin an sawi bawk.