Certificate leh Document lem siam MZP in pawi an ti; hemi kaihhnawih ah Police ten mi pakhat an man

Mizo Zirlai Pawl (MZP) chuan zirlaiten hun leh tha tam tak seng a Certificate an sual chhuah laia awlsam taka Certificate leh documents lem ngampa taka siamchhuah a ni chu an pawi an tih thu an sawi a. Hemi kaihhnawih ni ngeia hriat ah hian Mizoram Police te chuan mi pakhat an man thu an sawi bawk.

MZP hian nimin khan thuchhuah siamin Mizoram chhung ngeiah Certificate leh Documents lem hrang hrang siam a tam hle nia an hriat thu leh hei hi Mizoram tan leh zirlaite tana thil pawi tak a nih theih dawn avangin uluk taka chhui zui nghal a nih thu an sawi a. Heng documents hrang hrang- Educational Certificate (pawl sarih atanga chunglam zawng), Birth Certificate, Driving License leh Professional Certificate (B.Ed., D.El.Ed. adt) te hi timna nei hauh lova a lem siam chhuak an awm ngeia hriain, an finfiah hnuah dan anga hmalak anih theih nan Home Minister K. Sapdanga chu sawipuiin hmala tura an ngen thu an sawi a. Home Minister chuan chak taka bawhzui nghalin Certificate lem siamtu ni ngei a hriat mi pakhat chu Police ten manin Home Minister-in chak taka hma a laknaah lawmthu an sawi bawk a ni.

Hemi kaihhnawih ni ngeia hriat ah hian mi pakhat man a nih thu Mizoram Police chuan thuchhuah siamin an tarlang a, he an thuchhuah ah hian Oct. 25, 2024 khan Vaivakawn PS chuan mi pakhat, Lalneihpuia, Chawhhmun, Aizawl chuan Social Media-ah Certificate a siam theih thu a post tih thu dawngin, thu an zawhfiah hnuah August 2024 atang khan a Mobile Phone, hmangin Certificate lem hrang hrang, HSSLC/HSLC Marksheets, HSLC Certificate, Driving License leh Mizoram University Grade Card lem te pakhat Rs. 2000/- in dan phalna tel lova a siam thin thu a inpuang niin an sawi a ni.

MZP chuan Zirlaiten hun leh tha tam tak senga Certificate an sual chhuah laia awlsam taka Certificate leh Documents lem kan ramah ngei ngampa taka siamchhuah a ni chu pawi an tih thu an sawi a. Hetiang thil a awm tawh loh nan chak taka hmala turin sawrkar an ngen bawk.