Deputy Commissioner of State Tax, Serchhip Zone-in kumin ah Chhiah cheng vbc. 8 chuang an hmu tawh

Deputy Commissioner of State Tax, Serchhip Zone chuan sawrkar kum kal mekah September thla thleng khan Chhiah chi hrang hrang cheng vbc. 8 chuang hmu tawhin sawrkar kum liamtaa hemi hun chhunga Chhiah an hmuh aiin za zela 47.04 zetin an Chhiah hmuh hi a sang zawk a ni.

Deputy Commissioner of State Tax, Serchhip Zone Office atanga LENKAWL in thu a dawn danin sawrkar kum kal mek 2024-2025 ah hian thla ruk chhung (April - September) hian Chhiah chi hrang hrang Rs. 8,48,91,784/- zet an hmu tawh a, Chhiah an hmuh tam berna chu State Goods and Services Tax (SGST) niin heta tang hian Rs. 7,05,71,246/- zet hmuh a ni tawh a, VAT atangin Rs. 91,66,428/- hmuh ni tawh bawkin Profession Tax atangin Rs. 51,54,110/- hmuh a ni tawh bawk a, Serchhip District-a sumdawng zawng zawngte hnenah Profession Tax hi khawn mek niin tun thla hian zawhfel hman beisei a ni a, hei hi zawhfel a nih chuan Chhiah hmuh pawh hi la pung leh tura ngaih a ni.

Sawrkar kum liamta (2023-2024) nena khaikhinin kumin hian hun inang (April - September) ah Chhiah hmuh hi nasa takin a pung a, nikum (2023) April atanga September thla chhung khan Deputy Commissioner of State Tax, Serchhip Zone hian Chhiah chi hrang hrang Rs. 5,75,89,692/- hmuin nikum-a Chhiah an hmuh aia kumin-a Chhiah an hmuh punna hi za zela 47.04 a tling a, nikum a hemi hun chhung khan SGST-ah Rs. 4,82,92,067/- hmuh niin VAT-ah Rs. 49,66,053/- leh Profession Tax -ah Rs. 43,31,572/- hmuh a ni bawk.

Sawrkar kum kal mekah hian Chhiah an khawnkhawm pawh a pung chho ve leh hret hret mek a, kumin April thla khan Chhiah an khawn chi hrang hrang atang hian Rs. 3,80,28,766/- hmuin hei hi May thla khan tlahniam hretin Rs. 5,89,908/- hmuh a ni leh a, kumin June thla ah Chhiah an hmuh hi pung leh hretin Rs. 2,34,42,725/- hmuin July thla ah Rs. 47,45,949/- hmuh leh a ni a. August thla ah Rs. 88,07,642/- hmuin September thla ah Rs. 92,76,794/- hmuh a ni bawk a. Tunah hian October thlaa Chhiah an hmuh zat pawh a hriat leh theih tep bawk a ni.