Dan lova Shikhar leh Foreign Sikret zawrh te man a ni

Nimin khan Serchhip-ah Dan phalloh-a zawrh Shikhar leh ramdang siam Sikret dapchhuah hna thawh a ni.

Mizo Hmeichhe Insuihkhawm Pawl (MHIP) Sub-Hqrs. Serchhip in kumin September thlaa Consumer Awareness Campaign an neih an bawhzuina kal zelah nimin khan MHIP te hian Legal Metrology Department, National Tobacco Control Programme (NTCP) leh Health Department-a Food & Drugs Administration hotute chu phungbawm ah sawmin Serchhip-a Dawr hrang hrang ah dan lova Shikhar leh ramdang atanga dan lova lakluh Sikret zawrh a awm leh awmloh an enfiah a, Dawr hrang hrang atangin Shikhar Pack 46 leh Foreign Cigarettes (V 16 leh Far Star 12) a vaiin bawm 26 an man a, an thil man te hi tualchhung rate anga chhutin Rs. 4100 man a ni.

Hetianga Dawr hrang hrang enfiah a nih hma hian MHIP te hian sumdawnna dawr hrang hrangte chu dan lova Shikhar leh Sikret zuar lo tura ngenna lehkha an lo pe tawh a, an ngenna zawma zuar tawh lo engemaw zat awmin heng mi te chungah hian lawmthu an sawi a. Nimin-a an man sak te pawh zuar tawh lo tura ngenin, a tul anga enfiah hna hi thawh chhunzawm zel an tum thu bakah MHIP Branch te pawhin anmahni Branch theuh ah hma la turin an ngen bawk a ni.