Nov. thla ralhmain dan pangngaia tui sem beisei

PHE Department hotute chuan November thla ralhma in Aizawl mipuite hnenah a pangngai in tui sem theih an inbeisei tih an sawi.

Zirtawpni khan PHE Minister Prof. Lalnilawma chuan Tlawng lui-a Greater Aizawl Water Supply Scheme Phase I & II chu tlawhin Tui pump dan a enfiah bakah Tlawng lui lianin Pump House a tihbuai tawh lohna tura ruahmanna siam mek te a enfiah bawk a, PHE Department hotute chuan Fur laia Tlawng lui lianin Pump House leh an hmunhma te a tihchhiat nasat vanga tui pump a khaihlak tawh loh nan Pump House chhuat metre 2.7 a tihsan an tum thu leh ruahmanna pawh an siam fel tawh thu an lo hrilh a, Vertical Turbine Pump pawh tuilianin a chim tawh loh nan a chhuat tihsan a nih tur thu an sawi a. Tun dinhmunah tui hi a pangngai (39 MLD per day)-in an pump thei tawh tih sawiin, November thla ralhma in mipuite hnenah a pangngai-a tui sem theih an inbeisei tih an sawi a ni.