Award dawngtu lawmpui

Kumin-a India rama Nurse hna thawk tha te chawimawina sang, National Florence Nightingale Award dawngtu H. Mankimi, IOC Veng Serchhip chu nimin khan Serchhip District Hospital-a Nurse te chuan lawmpuina hun an hmang.
Serchhip District Hospital OPD Building-a he hun hman hi Sr. Nursing Officer Lalmuankimi chuan a kaihruai a, chawimawina dawngtu H. Mankimi chuan Serchhip District Hospital-a Nurse ten a chawimawina dawn lawmpuina hun an buatsaih chu lawmawm a tih thu sawiin, Nurse hna a thawh laia a thawh thin dan tlangpui te a sawi a, amah ang bawka he hna thawktute an rawngbawlna ngai pawimawh tur leh inpekna nena theihtawp chhuah thin turin a sawm bawk a. He hunah hian Nurse hna thawk mek te chuan lawmpuina thilpek chi hrang hrang an hlan bawk a ni.

Tarlan tawh angin India ram-a Nurse hna thawk tha te chawimawina sang ‘National Florence Nightingale Award’ hi kumin Sept. 11 khan President Droupadi Murmu chuan mi 15 hnenah a hlan a, an zingah hian Mizoram atangin District Hospital Serchhip-a Ward Superintendent (Rtd) H. Mankimi w/o R. Sanghmingthanga, Serchhip IOC Veng chu a tel a. He chawimawina hian thuziak, Medal leh Sumfai Rs. 100,000/- a keng tel a ni. H. Mankimi hian kum 1986 khan GNM Durtlang Hospital atangin Nurse hna a zir zo a, nikum (2023) March 5 khan Ward Superintendent-ah kaisangin March thla tawp khan Superanuation Pension in a chhuak a ni.