Chief Minister in Mizoram Economic Summit 2024 hmanpuiin sawrkar hmalakna hrang hrang a tarlang

Chief Minister Lalduhoma chuan sawrkarna an chan khan leiba tam tham tak an chhawm avangin an kawng a chho nghal hle tih sawiin, “Renchem takin kan sum te kan enkawl a. Chuvang chuan tunhmaa RBI balance chhe tak nei thin khan tun Financial Year tawpah kha chuan RBI Balance cheng vbc. 500 chuang kan lo nei ta a ni,” a ti.

Mizoram Economic Association ten nimin-a Aijal Club-a ‘Mizoram Economic Summit 2024’ an buatsaih a hmanpuina ah Chief Minister Lalduhoma chuan mithiam ten hetiang hun tha an buatsaih chu lawmawm a tih thu sawiin, “Sawrkarna kan chan khan leiba tam tham tak kan chhawm avangin kan kawng a chho nghal hle a. Theihtawp chhuahin, renchem takin kan sum te kan enkawl a. Chuvang chuan tunhmaa RBI balance chhe tak nei thin khan tun Financial Year tawpah kha chuan RBI Balance cheng vbc. 500 chuang kan lo nei ta a ni,” a ti a. “Healthcare sum ba te, Power Bill ba te kan pe thei ta a. Power Bill ah phei chuan rebate hmu hialin kan titha ta. GP Fund tam tham tak pekchhuah a ni a, Pension sum rei tak tak lo tang tawh te pawh chinfel a ni. Election duty bill tang tam tak pek a ni a, sawrkar hnathawkte hlawh leh hamthatna, hun rei tak lo batsak tawh te pawh engemawzat chin fel a ni,” a ti bawk.

Chief Minister chuan hmasawnna hnathawhna tur sum kan puk thenkhat chu State share sang lutuk chi te a lo awm thu sawiin, heng ang chi hi pumpelh hram hram tha an tih thu leh a theih chin chinah 100% grant leh 90:10 ang chite lam hawi an duh tih a sawi a. “Contractor-te agreement kan ziahpuiin Contractor te tana tha bik rana ziak lova, a sum petu sawrkar lam tana tha tur dap zel kan tum. Hna thawh chhia leh Contractor thiltih fel lova kan hrem theih loh hian hna khan a tuar a, sawrkar sumin a tuar bawk thin,” a ti a. Project an ziahin Central Scheme te nena inhnerem zel dap tur a nih thu leh Central Scheme te chhawr thiam tur a nih thu a sawi a. “Sawrkar Department leh Agency ten an tih theih ve reng Consultancy Firms kan tih tir thin pawh hi kan tihtlem a ngai,” a ti a. Integrity Pack an buatsaih thu leh hei hi chhungkhat laina hnaite duhsak taka Contract pek tumna vengtu pawimawh a nih thu pawh a sawi bawk a. K deposit-a sum kum thum aia rei dah tawh te an dap khawm mek thu pawh sawiin, cheng vbc. 400 chuang an lachhuak tawh niin a sawi.

Project reng reng Department-in ama thua a lo thehlut ve mai thin kha an remti tawh lo tih pawh Chief Minister chuan sawiin, “Planning Department kaltlang chauhva thehluh tawh nise kan ti. Hetiang bawk hian CSR pawh CM Office atangin kan vil tawh dawn a. CM Office in CSR hna thawh kan tum a ni lova, mumal leh fel fai zawk a CSR kalpui kan tum zawk a ni,” a ti a. Pending projects a tam tawh avangin a thehluttu Department ten an ngaihven zui tawh loh te a awm thu leh heng te hi singsaka kan ram mamawh mila thliarfel a ni ang tih a sawi bawk.

Chief Minister chuan SDG dashboard leh Project Monitoring dashboard an hawn thar thu pawh sawiin, “Project kan vil uluk hle tawh dawn. Utilization Certificate hi Central hian a hlawma pekfel zel a phut tawh a, Department thawk zo hma te kha a zo tlai ten an hnuk khawmuang tho tho thin. Heng hi vil uluk ngai kan ti,” a ti a. Department tinte chu Service Review Committee lo din tura an tih thu leh Sawrkar hnathawk tlak lo te dapchhuah a, a tul anga bantir thlenga hmalakna tur a nih thu te a sawi bawk a ni.

Mizoram Economic Summit 2024 hi Samuel J. Laltlanzaua chuan  kaihruaiin Dr. James LT Thanga, President, Mizoram Economic Association chuan he hun an buatsaih chhan te a sawi a. He Pawl hi Mizoram University leh College a Economics Department-a thawktu leh zirlaite bakah helam-a tui mi te teln a ni.