ZMC-ah Post Graduate Degree zirna hawng thar

Chief Minister Lalduhoma chuan nimin khan Zoram Medical College (ZMC)-ah Post Graduate Degree in Public Health zirna hawngin Girls' Hostel thar a hawng nghal bawk.

Heng thil pahnih hawnna puala inkhawm ZMC Conference Hall-a neih ah Chief Minister chuan he hun hi ZMC mai ni lo, Mizoram tana ni chhinchhiah tlak, hmasawnna hmel thar duhawm tak kan neih ni a ni tih sawiin, “Mizoram in Medical College kan neih chhun hi a hlu hle a, kan mamawh Medical Professionals tha kan chherchhuak tan ta. Kum 2018 a zir tan MBBS batch hmasa ber te kumin kumtirah an Graduate fel tawh a, batch pahnihna zirlai 97 ten intern an ti leh mek a. Zirlai 480 dangin an zir mek bakah batch thar admission pawh tih leh mek a ni,” a ti a. “Khawvel thang zel leh mipui pung zelah hriselna lama mithiam kan mamawh tam tial tial a. Chung kan ramin a mamawh te kan chherchhuahna hmun pawimawh chu a ni. Kumtin Doctor thar za vel in rawn chhuah zel chuan kan indaih chho ve tial tial dawn tih pawh a chiang a ni,” a ti bawk.

ZMC-in hma lam a pan zel tih a takin kan hmuh thu Chief Minister chuan sawiin, Post Graduate Course thar hawn a ni chu ropui a tih thu a sawi a, “Sawrkar chuan a ngaihthah ngai dawn lo che u a, zirna in tha zawk leh lian zawk a nih theih nan a theihna apiangah hma a la zel ang,” a ti a. “ZMC a thawkte hi sawrkar leh Society angin thuang hnihin in kal tih kan hria a. In zavaia sawrkar ta in nih theih dan tur kan ruahman mek a, Council of Ministers neih leh huna lo chhawpchhuah kan tum,” a ti a. Tunah hian 50 bedded Critical Care Block, PM-ABHIM scheme atangin sak an tum thu te pawh a sawi bawk.

ZMC-a Master Degree zirna hmasa ber tur Master of Public Health hi vantlang hriselna lama mithiam bik chherchhuahna tur niin, National Health Policy, 2017 in a ngaihpawimawh em em a ni a. Mizoram University hnuaia kalpui tur niin kumtin zirlai paruk (6) zel zir theihna tur leh kum hnih chhung zir a ni. A zir man hi kum khatah cheng nuai hnih (Rs. 2 lakh) vel a ni a. A batch hmasa ber tur mi 6 admit an ni tawh.

Girls' Hostel building thar, Curie's Ladies Hostel tia a hming vuah hi Ministry of DoNER, NESIDS OTRI sum cheng vbc. 10 hmanga sak niin a tirah khum 80 awm theihna tura duan a ni a. Amaherawh chu khum 84 dah theih tura sak zawh a ni thung a. Mess, Kitchen leh Common Room te neiin Mizo chhiar dana chhawng ruk a sang a ni. He Hostel thar leh Hostel lo awm tawhsa khum 202 te nen ZMC-ah hian a vaiin Girls' Hostel khum 282 a awm tawh dawn a. Hmeichhe zirlai zawng zawng te khum mamawh hi pek theih deuh vek beisei a ni. Girls Hostel sak rual chiah hian Boys' Hostel sakna tur pawh hmuh niin sak mek a ni.