MPSC in an hnathawhna kawngah sawiselna leh rawtna nei tan thlen theih reng a nih thu an sawi

Mizoram Public Service Commission (MPSC) chuan MPSC chu Constitutional leh Independent body a nih thu sawiin, Sawrkar leh mipui tana hna a thawhna kawngah sawiselna leh rawtna nei an awm chuan Chairman emaw, Secretary emaw hnenah a duh tan a thlen theih reng tih an sawi.

MPSC hmalak dan chungchang mipuite hnena thuchhuah siama an tarlan ah MPSC chu India Danpui, Article 315 hnuaia din a nih thu leh din a nih chhan ang ngeiin mipui leh Sawrkar tan chhen fakawm takin a tir atanga Vawiin thlengin Commission hian hna a la thawk chhunzawm zel tih MPSC chuan an tarlang a. MPSC chu Constitutional leh Independent body a ni tih sawiin, Sawrkar leh mipui tana hna a thawhna kawngah sawiselna leh rawtna nei an awm chuan Chairman emaw, Secretary emaw hnenah a duh tan a thlen theih reng a nih thu an sawi a, Chanchinbu leh Social Media-a an zualko hmain thil awmzia hriatchian hmasak tum phawt tur leh sawiselna leh rawtna neite chuan Office lamah ziaka thehlut zawk thin turin mipuite chu an ngen a. Tunhnaiah MPSC-a rinna nghat mi tarn tak an awm te, MPSC a kalsual palh hlauhna avanga Social Media leh chanchinbu lama thahnem ngai taka auchhuak thin an awm chu lawmawm an tih thu an sawi bawk.

MPSC thuchhuah chuan ‘MIPUI AW’ (CPGRAMS) leh ‘RTI Act’ hmang tangkaia MPSC tana thil tangkai tur zawhna, rawtna leh sawiselna thlen thin mi engemaw zat an awm thu pawh sawiin, heng te hi MPSC tan an hlu lehzual em em tih an sawi a. Right to Information (RTI) Week, 2024’ ah ‘RTI Excellence Award, 2024-2025’ lawmman pakhatna an dawn thu pawh tarlangin, hei hian Commission hi langtlang taka hnathawk thin, khua leh tui (a bikin hna zawng mek) te chanvo tha taka humhim saktu leh Democracy chawinungtu pawimawh tak a ni tel bawk tih a entir niin an sawi a. Mipuite pawh RTI Act hi hmang tangkai chhunzawm zel tura sawmin, chumai bakah MPSC hnathawh danah rawtna emaw, sawiselna emaw nei an awm chuan lawm taka dawng turin Commission chu a inpeih reng tih an sawi bawk a ni.