Mizoram State University Bill sawihona neih a ni

Higher & Technical Education Minister Dr. Vanlalthlana hovin nimin khan ‘Consultative Meeting on Draft Mizoram State University Bill’ chu Stakeholder-te nen neih a ni.

Mizoram Secretariat Conference Hall-a Consultative Meeting neih ah hian Higher & Technical Education Department Official-te, Mizoram College Teachers’ Association (MCTA) aiawh leh State sawrkar hnuaia College thlan bikte atangin Principal leh faculty member-te an tel a, he Draft bill-a sawihot?ula hriat lai te sawi hovin zawhna leh chhanna hun hman a ni a, sawifiah ngaite sawifiah niin sawihona hun hman a ni a. Draft Mizoram State University Bill hi Assembly House-a a putluh theih turin Cabinet Meeting-a thlirho tura chhawpchhuah ni ang.

National Education Policy 2020 chuan State University la nei lo te chu kum 15 chhunga din turin a beisei a. Tun dinhmuna Mizoram in a hrana State University a neih loh avang leh a awm sa Mizoram University leh ICFAI te chu Central University leh Private University a nih avangin NEP 2020 duh danin Mizoram sawrkar chuan ke a pen chhoh a ngai a. Mizoram State University hi din a nih chuan tuna State sawrkar hnuaia College-te chu State University hian a enkawl tawh dawn a ni.

Tun dinhmunah Mizoram State University din tura ruahmanna atan hian Bill Drafting Committee leh Study Team din tawh niin Study Team hian Cluster University of Srinagar leh Cluster University of Jammu kal dan zirchiangin Bill Drafting Committee thlirho turin an thehlut tawh a. Draft bill hi Finance Department leh Law & Judicial Department nen pawh Higher & Technical Education Minister kaihhruaina hnuaiah enho tawh a ni bawk. Draft Mizoram State University Bill-ah hian Mizoram State University chu Post-Graduate programme zirna tura ruahman a nih bakah, Multidisciplinary leh Eesearch-oriented Institute ni tura duan a ni a. Hemi tur hian ram luah turte pawh en thlithlai tan niin State-in resource a neih sa zirchian mek a ni a. A bul atanga State University thar hlak din a hautak dawn avangin, State College thlan bik pali (4) chu sawikhawmin Cluster University neia Mizoram State University hi din tura ruahman a ni.