CADC thutlukna in inbiakpawh leh inhriatthiam kawngah thui tak a pui thei tih Larsap in sawi

Mizoram Larsap Dr. Hari Babu Kambhampati chuan Chakma Autonomous District Council sawrkarin Chakma zirlaite tan Mizo tawng zir tura thutlukna a siam chuan, Chakma leh Mizote inbiakpawhna leh inhriat-thiamna kawngah thui tak a pui dawn tih a sawi.

Inrinni kaltaa Mizoram Chakma Students' Union, Zonal Hqrs. Aizawl in zirlai tharte lawmluhna leh Awareness Campaign Aizawl Vanapa Hall-a an buatsaih a hmanpuina ah Governor chuan October 4, 2024-a Chakma Autonomous District Council Executive Committee tum 11-na neihin Primary atanga a chung lamah te Mizo subject zirna kalpui tura thutlukna pawimawh tak a siam thu sawiin, “Hei hian zirlaite tawng chi hnih bel taka thiam kawngah a pui thei dawn a, Mizo tawng thiamna chuan Mizote nena inbiakpawh leh inhriatthiam kawngah thui takin a pui theih dawn bakah zirna leh hnathawhna hmun thlengin a pui thei dawn a ni,” a ti a. Governor chuan zirna chawisan kawngah Mizo zirlai pawl dangte nen lungrual leh inzahtawn taka hmalak tlan a pawimawh thu sawiin, “Tualchhung amite tihdan leh hnam ziarangte zira inherrem pah chung leh an kalphung, khawtlang nun leh rinnate zah tak chungzelin inkawmhona leh thil tihhona ah te in hnam ziarang leh tihdan phungte pholanga chawinun zel tum ang che u,” tiin Chakma zirlai kalkhawmte a chah bawk a ni.

Governor chuan zirlai dangte nena tanho a awlsam zawk nan Chakma zirlaite chu School leh College-a infiamna, zirna leh hmalakna hrang hrangah te tel tama hnamdangte nena inthianthatna nghet siam ngaipawimawh turin a chah a. Zirna chuan zir laia tihthat ngawt nilo, mihring puitlinga siam lam thlenga a huam tel thu sawiin, zirna chuan indaidanna te tizimin khawtlangah inpumkhatna a siam thei a ni, a ti a. Zirlai kalkhawmte chu zirlai mai nilo, hnam ziarang chawilartu leh khawtlang nun siam thatu an nih tel thu pawh sawiin, rinawmna nen mawhphurhnate hlenchhuah zel tum turin a fuih a. India ram hmun dangte ruala Mizoram in hmasawnna kawng a zawh chhoh ve mek zelah Mizoram in hmabak eng tak a neih theih nan a chhunga cheng zirlai hrang hrangte'n chanvo pawimawh tak hlen chhuah tur an neih thu a sawi bawk.

He hunah hian Chakma Autonomous District Council (CADC)-a Assistant Adult Education Officer Kalendra Tongchangya chu khual zahawm niin zirna leh hmasawnna rahbi hrang hrangah tanlak a tul thu sawiin, zirlaite chu theihtawp chhuaha lehkha zir tur leh hlawhtling ngei tura tan la turin a fuih a. Ram leh hnam tana nakin lawka innghahna tur an nih avangin theihna an neihte ringhlel lova taima taka hmalam pan zel tum turin a fuih a ni. He hunah hian inzirtirna leh infuihtharna hun hman niin, zai leh hnam lam hmuhnawm tak takte ngaihthlaka thlirho a ni bawk.