Kaihchhuah theih turin ban phar-a penchhuah ngai ti

UD&PA Minister K. Sapdanga’n sawrkarin a kalpui mek Bana Kaih hmanga kaihchhuah theih turin mipuiten ban an phar a, an penchhuah a ngai tih a sawi.

Nimin-a Aijal Club Park, Aizawl-a Deendayal Antyodaya Yojana - National Urban Livelihood Mission (DAY-NULM) hnuaia Aizawl City Mission Management Unit buatsaih, ni 3 chhung awh tur DAY-NULM Festival-cum-Street Food Festival a hawnnah Minister chuan he thu hi sawiin, UD&PA Department hna pawi-mawh ber zinga mi chu DAY-NULM a nih thu a sawi a. DAY-NULM chu mi harsate chhawmdawl a, eizawnna neilote tana eizawnna ngelnghet an neih theih nan a hmalakpui chu a tum ber a nih thu sawiin, hemi hnuaiah hian hmasawnna ruhrel din ni lo, mihring dinhmun chawikanna anih avangin a pawimawh in hmalakna tha tak a ni, a ti a. He hmalakna avanga hlawhtlinna hmutu ten a tangkai zia an hmuh ang bawkin midangin a nachang an hriat ve zel a, tam zawkin hlawhtlinna an chan theih nan induhsak tawn nise a duh thu a sawi bawk.

UD&PA Minister chuan an Department hnathawkten mi tam tak eizawnna an siam saka hna tha tak an thawh chu a tawk mai lo a, inzarpharhin mipui tam lehzualin an hnathawh te an lo hriat a, an lo hlawkpui theih tura puandarh hna thawh uar a ngai tih a sawi a. Puanzar hna thawk tura inren lo turin Department hotute a fuih bawk a ni.

DAY-NULM Festival-cum-Street Food Festival hawnna inkhawm hi UD&PA Secretary Lalmalsawma Pachuau chuan kaihruaiin DAY-NULM State Mission Director Dr. Andrew H. Vanlaldika chuan kaphung leh he Mission hnuaia hmalakna hrang hrang leh hmachhawp te a sawi a. Festival chu DAY-NULM hnuaia hamthatna dawngtute tana buatsaih niin District hrang hrangah neih thin a ni a, tun tum hi a vawi 3-na niin District dangah chuan kumtir lamah an nei a. Nimin a Festival-ah hian hamthatna dawngtu mi 47 te telin heng mi te buaipui hian stall 19 hawn a ni.