Serchhip District chhunga Handholding Scheme kalpui dan tur ruahmanna hrang hrang siam a ni

Serchhip District Agriculture Marketing Committee (DAMC) chu nimin khan an Chairman leh Bawrhsap Paul L. Khuma hova thukhawmin Handholding hnuaia thlai tharchhuah lakkhawmna hmun tur te leh he Scheme hnuaia Society din thar te chungchang an sawiho.

He thutkhawm Serchhip DC Meeting Hall-a neih ah hian Mizoram Sawrkar hmalakna pui ber Bana Kaih - Handholding Scheme hnuaiah hian thlai chi li dah niin chung te chu - Sawhthing, Aieng, Hmarcha leh Hmunphiah te a nih thu tarlan a ni a. Heng thlai thar chhuaktu farmer te chu Society ah ziahluh an ni dawn a. Serchhip District chhungah khaw 39 awmin Sawrkarin inkaihhruaina a siam angin khawtinah Society pakhat theuh din a ni dawn a. Nimin-a thutkhawm ah hian heng khaw 39 atanga Society din tur rawtna lutte thlirho niin DAMC chuan a pawmpui a ni.

Society member ten thlai thar an chhunkhawmna tur, Primary Collection Centre (PCC) hi khaw tinah pakhat theuh din a ni dawn a. A dinna tur leh a hmun tur te hi Society te kutah a awm dawn a. Society te hi Cooperative Society (PACS) te guideline zulzuia din tur niin nimin a DAMC thukhawm chuan an inkaihhruaina dan, Terms of Reference mumal takin siamsak ni se tiin an rel bawk a ni.

He hmalakna hnuaiah hian Serchhip District chhunga khaw 39 te chu Cluster 4-ah DAMC chuan a then a. Chungte chu - Khawlailung Cluster, Thenzawl Cluster, Serchhip Cluster leh Chhingchhip Cluster te an ni a. Heng Cluster tinah hian Secondary Collection Centre (SCC) pakhat theuh siam a ni ang. Secondary Collection Centre hmunhma tur hi a rang lama enfiah nghal nise tiin Line Department - Agriculture, Horticulture leh Soil Department te kutah dah a ni bawk. Quality endik leh chhinchhiah chungchangah Primary Collection Centre tin ten rualkhai zawka an hman theih tur profoma siam sak ni se tiin Committee chuan a rel bawk a. PCC te leh SCC te hnathawh dan endik, an sum che vel enfel (audit) leh pawimawh dangte viltu tur pawh an ruat nghal bawk.

Handholding hnuaia Training chu Additional DC kaihhruaina hnuaiah a rang lama kalpui tur a ni a. Karleh chhungin Training Calendar leh a kaihhnawih dang ruahmanna te peihfel nghal a ni dawn a. Society member te, PCC leh SCC-a mawhphurhna neitute zawng zawng tan training hi November thla chhungin vawi engemawzat buatsaih tura ruahman a ni bawk.

Nimin-a thutkhawm ah hian DAMC member te leh MAMB Co-opted Member Isack Lalremruata te an tel a. Bawrhsap Paul L.Khuma chuan chanvo hrang hrang neitu member te chu thahnemngai taka an mawhphurhna te hlenchhuak theuh turin a sawm a ni.