Sustainable Development Goals Dashboard thar leh Project Monitoring Committee Dashboard hawn a ni

Chief Minister Lalduhoma chuan Sustainable Development Goals Dashboard thar leh Project Monitoring Committee Dashboard (MPLAN) thar te chu nimin khan a hawng a. Chief Minister chuan Department te chu data dik tak zel thun tum turin a chah bawk.

Planning & Programme Implementation Department Conference Hall-ah Sustainable Development Goals Dashboard thar leh Project Monitoring Committee Dashboard (MPLAN) thar hawnna ah hian Chief Minister chuan hun reilote chhunga dashboard pahnih peih a ni chu lawmawm a tih thu sawiin, “Heng dashboard pahnih te hi data dik tak thunluh hmanga kalpui tur a ni a. Data dik lo kan thun chuan kan dinhmun dik tawk lo min phochhuahtir dawn a. Chuvangin Department tinten an data te chu dik tak chauh rawn thun turin ka chah a ni,” a ti a. “Data dik a nih phawt chuan tlakhniam deuh pawh i hreh lo ang u. Kan dinhmun dik tak kan hriat kha a pawimawh hmasa a ni,” a ti.

Chief Minister chuan Project te hi khuarei daih (sustainable) hmasawnna min thlentu an nih a ngai tih pawh sawiin, “Project thenkhat hi tha tak angin lang, mahse kawng danga min tichhetu a lo ni ve reng thei. Chuvang chuan Project khuarei daih leh tha zel kha kan thlan thiam a ngai,” a ti a, hei bakah hian project kal fuh tawk lo, han hlamzuih te, a huna zo thei lo te a awm loh nana vil rengtu tur Project Monitoring Committee kan nei tawh tih sawiin, “Kan project te hi kal tluang se, a hun takah zo thei ila, kan ram hian chak takin hmasawnna hmu se kan duh a ni. Chumi kawnga nasa taka min puitu tur chu Vawiina kan hawn MPLAN Dashboard hi a ni. Role Base Access Control nei a nih angin ka Office Room atangin engkim ka lo hmu ve thei tawh dawn a. Ka nghakhlel hle a ni,” a ti.

Sustainable Development Goals Dashboard thar leh Project Monitoring Committee Dashboard (MPLAN) hawnna hun hi Planning Department-a Commissioner Vanlaldina Fanai chuan kaihruaiin Chief Secretary Dr. Renu Sharma pawhin thu a sawi a, Planning Department changtu Secretary Lalmalsawma Pachuau chuan heng dashboard pahnih te an duan chhoh dan tlangpui a sawi bawk a. Heng dashboard pahnih te hi data thun hna thawh leh phawt tur niin nakum January thlaah chuan kalpui hman tum a ni.

SDGs dashboard hi Sustainable Development goals lama State Level atanga Village Level thleng vilna tur a ni. Mizoram-a khua zawng zawngte SDGs dinhmun a en theih ang a, Block Level dinhmun te, District Level dinhmun chenin a en theih ang. SDGs Local Indicator Frameworks hi State sawrkarin a duh dan anga a duan tur a ni.

MPLAN Dashboard hi Integrity Tech Solutions Private Limited te nena siam a ni thung a. A siamna tur sum hi NITI Aaayog State Support Missions atanga hmuh cheng nuai 69.99 a ni. He dashboard hi project proposal te, DPR te thehluhna tur a nih bakah Cost Benefit Analysis te, Project Feasibility te lo zirchian (analysis) thlengin a thawk thei a. Project ziaktute tan State Level data pawi-mawh hriatna a pui thei bawk anga, Project Monitor lamah a tangkai hle ang.

Project details te, Project Management te, Scheme Surveillance te, Project Evaluation te, Project Resemblance Matrix te leh Best Practices thlengin a lang vek dawn a. Mizorama kalpui Central Sponsors Scheme (CSS), Central Sector Schemes leh State Projects zawng zawngte dinhmun leh hmasawn dan chipchiar taka dahluh vek tur niin Role Base Access Control neia duan a ni a, heng Projects zawng zawngte kalpui dan hi Chief Minister chuan a Office atangin engtiklai pawhin a lo hmu ve nghal zel thei dawn a ni.