Larsap hovin National Ayurveda Day hman a ni

National Ayurveda Day, 2024 chu nimin khan Aizawl-a Assembly Annexe Conference Hall-ah hman a ni a, Mizoram Governor Dr. Hari Babu Kambhampati chuan he hun hi khuallian niin a hmanpui a ni.

Directorate of AYUSH, Health & Family Welfare Department buatsaiha National Ayurveda Day vawi 9-na hman ah hian Governor chuan hmanlai atanga inenkawl nana lo hman tawh thin Ayurveda chu hriselna kawnga inenkawlna mai nilo, nunphunga bet tel tlat a nih thu sawiin, “Kum sangbi kalta atang tawh khan India ramah damna atana hman a ni a, rilru, taksa leh thlarau thlenga awmze nei taka thlunzawm kaltlanga hna thawk a ni,” a ti a. Ayurveda chu tunlai natna tlanglawn Lung natna, Cancer, Stroke leh Zunthlum venna kawngah a pawimawh tih khawvelin a hmelhriat chhoh ve mek zel thu sawiin, Mizoram leh North East India chu Biodiversity hrang hrang tamna, hemi kawnga hausa leh theihna nasa tak nei a nih avangin hengte leh Ayurveda kan thlunzawm phawt chuan kan Healthcare System hi kan tihchangtlun thei dawn a ni, a ti bawk.

Governor chuan tunlai thiamna leh tihdan phung tlo leh tha zawkte nena Ayurveda kalkawp tir thiam chuan India mai nilo khawvel pum tan hlawkna a pek theih dawn thu pawh sawiin, “Ayurveda hian khawvelah ngaihven a hlawh chho mek zel a, ram 24 te'n an pawmpui tawh a, tunlai zirna In te pawhin Ayurveda hlutna an pawh chho mek zel a ni,” a ti a. Ayurveda chawilar kawnga Sawrkar laipui Ministry of AYUSH hmalakna hrang hrangte tarlangin, Ayurveda atanga thil siamte ram 100 chuangah thawnchhuah tawh a nih thu a sawi bawk.

He hunah hian khual zahawm Health Minister Lalrinpuii pawhin Ayurveda-in tunlai natna hrang hrangte enkawl kawngah pawimawhna a neih thu sawiin, Mizorama ramhmul damdawi tam tak kan neih leh hemi lama tualto thiamna kan neihte chu Ayurveda chawilar kawngah a tangkai theih thu leh Healthcare System pangngai nena kalkawp tir thiam a tul thu a sawi a. State Medicinal Plants Board Chairman ni bawk chuan ramhmul damdawi chin leh sawngbawl kawnga hmalakna te tarlangin, cheng vbc. 1.2 project 'Forward and backward linkage in supply chain of medicinal plants - Integrated Component' kalpui mek a nih thu leh Hand Holding policy-ah Medicinal Plant telh tuma hmalak mek a nih thu a sawi a. AYUSH hmalaknate chu Healthcare System nena kalkawp turin PHC, CHC, District Hospital, AYUSH Health & Wellness Centre 41 leh Integrated AYUSH Hospital, Thenzawl-ah te hmalak tum a nih thu a sawi bawk.

He hunah hian Ayurveda chanchin leh Mizorama Ayurveda hmalakna te ngaihthlak niin National Ayurveda Day puala Article inziahsiak lawmman sem a ni bawk.