Lenkawl

PM Cares for Children Scheme hmalakna thilah nimin khan rampum-a District thuneitute chuan Prime Minister hovin Virtual Meeting an nei a, he hunah hian PM Cares for Children Scheme, 2021 tanpuina dawng tura thlan te hnenah tanpuina semchhuah niin Serchhip District atangin mi 4 in an dawng a ni.

Zirlai naupangte tan rilru leh taksa lama rualban lohna chi hrang hrang inzirtirna chu nimin khan Marian H/S Serchhip-ah neih a ni.

Pathianni-a boral Serchhip Dinthar Veng-a Rosangzuali chu a pasal, PC. Zobiaksanga chuan kut a thlak ngei tih a sawi a, Rosangzuali ruang hi nimin tlai khan an khua, Lungleng-ah vuiliam a ni.

Serchhip District-ah COVID-19 hri kai hmuh pung leh hlekin hri kai enkawllai pawh mi 13 lai an awm leh tawh.

Ruahman lawk tawh angin Mizoram Board of School Education (MBSE) chuan kumin a Higher Secondary School Leaving Certificate (HSSLC) Exam result chu Vawiin chhun dar 12:00 hian a tichhuak dawn a. MBSE Office leh website www.mbse.edu.in-ah en theih niin Whatsapp leh Phone call in 9863722521 leh 9863883041-ah zawh theih a ni bawk ang.

BJP Mizoram Pradesh chuan nimin khan Aizawl-a an Office-ah kar thar inhlanna neiin an President Vanlalhmuaka chuan Grape chingtute eizawnna pui ber, Grape rah atanga tui siamchhuah man sak an ni ta mai chu a pawi takzet tih a sawi a. “Grape Wine an khap dawn a nih chuan Grape chingtu te harsatna sutkian dan tur hi rang taka ngaih-tuah turin Mizoram Sawrkar ka ngen a ni,” a ti.

Save Chite Lui Coordination Committee chu nimin khan an Chairman leh Chief Secretary Renu Sharma-i hovin Chief Secretary’s Conference Hall-aah an thukhawm a, Chite Lui Act/Rules in a phut angin June thla chhung ngeiin Save Chite Lui Coordination Committee chu Society a leh nisean ti a ni.

State Level Sub- Committee on Green Mizoram in kumin-a Green Mizoram Day hman dan tur a lo ruahman tawh te thlirin nimin khan State Level Committee on Green Mizoram chu Vice Chairman leh EF&CC Minister TJ. Lal-nuntluanga hovin PCCF Conference Hall-ah an thukhawm a, kumin-a Green Mizoram Day hmanna ah tuihna humhalh leh tihpun nan thing phun uar a tul zia leh a zau thei ang bera inzirtirna hmangin mipui leh zirlaite uar taka zirtir nise an ti a. June 11-a Green Mizoram Day chu Inrinni ah a tlak avangin June 10, 2022 (Zirtawpni)-ah hman a ni dawn a. Chief Minister Zoramthanga chu khuallian atana beisei niin, Addl. Secretary chin chunglam, Head of Department leh NGO te tel tura beisei an ni.

Nimin khan a tum 2-na atan RTI Act Section 4(l)(b) zawm tha lo Public Authorities 11 te chuMizoram Information Commission-a Chief Information Commissioner Lalnunmawia Chuaungo leh Information Commissioner Zorammawia te hmaah an inlan a, heng te hi Directorate of Economics & Statistics, FOCUS, Irrigation & Water Resources Department, Printing & Stationery, MIZOFED, SIPMIU, State Election Commission, PHE, LESD&E, DC Office Aizawl leh ZIDCO te an ni a. Heng te hi RTI Act, 2005 Section 4(l)(b)-in Public Authority/sawrkar department-te an hnathawhna chungchang mipuiin awlsam zawka an hriat theihna turin point 17 tarlanga an Office Website-ah dah ngei tura tih zawm lo te an ni.

Association for Environmental Preservation (ASEP) General Hqrs. chuan nungcha humhalhna kawngah hmasawnna tha zawk a awm theih nan nimin khan Ailawng, Reiek, West Lungdar leh Chungtlang khuaah te Mobile Street Campaign leh nungcha humhalhna kawnga ngenna lehkha (Appeal letters) semchhuahna hun an hmang a, he Campaign-ah hian khawlai remchang laiah nungcha humhalhna thu an tlangaupui bakah heng khaw hrang hranga chhungkaw tinah ramngaw leh nungcha humhalhna tura ngenna lehkha an semchhuak bawk a ni.

Central YMA, MUP, MHIP, MZP leh MSU te telna, NGO Co-Ordination Committee chuan nimin khan Aizawl Press Club-ah thuthar thehdarhtute kawmin Mizoram Chief Secretary-ah Mizo ngei an awm theih nana sawrkar laipui-a ngenna tum engemaw zah an thehluh tawh chuan ngaih pawimawh a hlawh lo nia sawiin, ram leilung fa ngei Chief Secretary-a dah a nih theih nan, tuna Chief Secretary nilai Pisa kai tur chu Vawiin, May 31, 2022 atangin an dang dawn tih an sawi.

Pathianni khan Mizoram-ah Sample 46 enfiah niin heng atang hian COVID-19 hri kai mi 7 hmuhchhuah an ni a, Sample enfiah atanga chhutin za zela 15.21 te chuan hri an kai a, nimin khan hri kai mi 38 te enkawl dam an ni bawk.

Mizoram Wood Based Industries Owners Association hruaitute chuan nimin khan Governor Hari Babu Kambhampati chu Raj Bhavan-ah hmuin an harsatna te sutkian a nih theih nan hma laksak turin an ngen.

Mizoram sawrkar-a Planning & Prog-ramme Implementation Department leh State Institute of Rural Development & Panchayati Raj (SIRD & PR) te tangkawp hmalakna thar, thingtlang khua hmasawnna leh intodelhna tur ‘Village Level Development Programme’ Pilot Project chu nimin khan Lunglei District-a Sekhum khua ah bialtu MLA leh MYC Chairman Dr. Vanlaltanpuia chuan a hawng.

Champhai District-a Grape chingtu pawl pahnih te chuan Grape Wine hralh kawngah eng harsatna mah siam sak lo tura sawrkar an duh thu an sawi.

Nimin May 29, 2022 (Pathianni) chawhnu lama Serchhip Dinthar Veng-a nupa kut inthlakna thleng ah Rosangzuali chu boralin hemi chungchangah hian a pasal Zobiaksanga chu thu zawhfiah turin Serchhip Police ten an man nghal.

Serchhip Police leh Serchhip District Mizo Cement Mistiri Association te chuan Inrinni khan Serchhip bakah Keitum leh Bungtlang khua ah te Mizoram-a hnamdang awm te ILP enfiah hna an thawk a, dan lova Mizoram-a hnamdang awm mi 4 hmuhchhuah niin Police ten an Dan angin hma an la chhunzawm dawn a ni. Thudawn danin heng ILP fello an man te hi Serchhip-ah mi 3 leh Bungtlang-ah mi pakhat te an ni.

Hmeichhia te thla tin thi neih chungchanga hriselna leh thianghlimna inzirtirna hun, World Menstrual Hygiene Day chu India ram State hrang hrangah National Integrated Forum of Artists & Activists (NIFAA) leh Project Baala tangkawp chuan Guinness World Record thar siam tumin an hmang.

Nimin May 29, 2022 kha Baptist Church of Mizoram (BCM) hnuaia Thalai Kristian Pawl (TKP) te chuan Ramthim Ni atan an hmang a, he ni denchhen hian Serchhip Pastor Bial TKP-a Unit pathum (3) te chuan Inrinni khan Serchhip Blood Bank-a dah turin thisen Unit 31 an pe a, thisen petute hi mipa 17 leh hmeichhia mi 14 te an ni. TKP Ramthim Ni hi BCM in rampawn a Missionary a tirhchhuah hmasak ber Rev. H. Rokhama te nupa a tirhchhuah ni denchhena ruat niin kum 2007 atang khan May 29-ah hman thin a ni.

Serchhip District Anti-Tobacco Squad te chuan Inrinni zing khan Serchhip Bazar leh a chhehvel-ah puipunna hmun-a mei zuk khapna dan bawhchhia an awm leh awmloh enfiah hna an thawk a, he hunah hian puipunna hmuna mei zu mi pathum manin dan anga pawisa chawitir a hrem an ni.

Nimin tlai thleng khan Serchhip District-ah COVID-19 hri kai enkawllai mi 9 an awm.

Kumin-a MJA leh I&PR Department ten kum 50 an tlin lawmna chikhat atan Inrinni zan khan MJA Serchhip District Member, Serchhip DIPR Office-a thawk te leh Serchhip District-a MJA Member lo ni tawh te chuan Zotawna Futsal Ground-ah Futsal Match an khel a, hemi hmalam hian MJA Member te leh I&PR-a thawk te hian Badminton an lo khel tawh bawk a ni.

Kar kalta chhung khan Serchhip-a Excise & Narcotics Department te chuan Heroin No. 4 tum thum zet an man.

Mizoram-a Petrol lakluh kawnga harsatna a thlen hnuah Serchhip-a Petrol Pump awm-chhun PB. Lalzuithanga FS pawhin Inrinni khan Petrol an ti thleng ve leh ta a, Inrinni atang vek khan hralhchhuah nghal niin mipui harsatna zualpui chu a ziaawm ta rih a ni. Tunah hian Petrol hi Two Wheeler-ah Rs. 300/- man, Auto Rick-shaw-ah Rs. 500/- leh LMV-ah Rs. 1000/- man a semrual niin bur a dawh phal a ni lo thung.

Aam Aadmi Party (AAP) Mizoram chuan Inrinni khan Aizawl-a MZP Conference Hall Vantlang Inkhawm neiin he hun hi Organising Chairman Andrew Lalremkima chuan a kaihruai a, AAP anga an hmalak tawhna hrang hrangte tarlan niin tunah hian District hrang hrangah Membership Drive neih chhoh mek a nih thu leh hmasawnna duhawm tak  hmuh anih thu bakah IT Cell te din anih thu tarlan a ni bawk.

Lawngtlai District Hospital-a thawktu indaih-lohna avang leh Bungtlang South PHC-a Medical Officer awm loh avanga Mizoram Sawrkar nawr nana Central YLA huaihawta lungawiloh lantirna atana sawrkar Pisa kai tur danna chu ni 3 chhung kalpui a nih hnuah Inrinni khan tihtawp a ni ta a, tun dinhmunah sawrkarin Doctor Specialist - Gynecologist, Pediatrician leh ENT Specialist te District Hospital-a thawk tur a dah thar tak avang leh Bungtlang South PHC-a Medical Officer an dah tâk avangin lungawi lohna an lantir hi an titawp ta a ni.

Lunglei District chhung Haulawng khua a tihchhuah Lawhleng Weekly Newspaper chuan Inrinni khan an kum 21 tlin lawmna Hausiampa Hall-ah neiin he hun hi Tourism Minister Robert Romawia Royte chuan a hmanpui a, Media mi te chu thu dik tan tlat a, thlei bik nei lova thu puang darh thin tura fuihin, mipuite sukthlek siam saktu leh mipui rawngbawltu pawimawh tak an ni tih hre thar turin a chah a, Haulawng Field leh Volleyball Court chu nuai 30 senga siamthat thuai anih tur a puang nghal bawk. He hun hi MJA General Hqrs. President C. Lalrambuatsaiha leh MJA member ten an hmanpui bawk a ni.

Mizorama Rel kawng siam hna thawh mek leh hmalak zelna tur chungchangah Zirtawpni khan Chief Minister Zoramthanga leh Union Minister of State for Railways and Textiles Darshana Jardosh hovin inkawmna neih a ni a, he hunah hian Mizoram sawrkar leh Rail India Technical and Economic Service (RITES) Limited inkarah thawhhona thuthlung (Memorandum of Understanding) ziah a ni. He hunah hianRITES Ltd. a Chairman and Managing Director Rahul Mithal chuan hmasawnna ruhrel hrang hrangah ram chhung leh ram pawn thlenga hnuhma an lo neih tawh thu sawiin, Mizoram nen thawhhona tha tak neih ngei a beisei thu a sawi a ni.

Nimin tlai dar 5:00 thleng khan Mizoram-ah COVID-19 hri kai enkawllai mi 154 an awm.

Mizoram State Cancer Institute-a Cancer hemna khawl chi khat – Brachytherapy Machine bun thar chu Inrinni khan Health Minister Dr. R. Lalthangliana chuan a hawng.

Union Minister of State for Education and External Affairs Dr. Rajkumar Ranjan Singh chuan Inrinni khan Mizoram University-a Research Scholars' Hostel leh Faculty Development Centre te chu a hawng.

Serchhip Sub-Hqrs. YMA Vigilance & Monitoring Committee chuan NH. 54 in Serchhip khua a helna tura kawng laih mek, Sailiamkawn leh New Serchhip inkar bakah Chhiahtlang dai a kawng laihzauh leh siamthat hna thawh mek te chu a hmunah an enfiah a, helai hmuna hnathawh tha lo nia sawi te chu enfiahin hmanraw tha lo nia sawi te pawh an en bawk a ni.

Govt Serchhip College NSS Unit ten an College Campus-a Mizo thei huan, Garden of Mizo Indigenous Fruits an siam chu nimin khan NSS Volunteer ten samfai hnatlang neiin thei an phun belh a, he hnatlang ah hian NSS Volunteers 14 leh PO pahnih C. Lalramliana leh H. Lalchhanhima te an tel a ni. Mizo thei huan ah hian nikum 2021 atang khan Mizo thei chi hrang hrang phunluh tan a ni a. Tunah hian Thei chi hrang hrang 40 vel phun ni tawhin, tun Thal chhung khan Thei thenkhat erawh an lo thi a. Nimin khan Chengkek kung 8, Theihai 3, Kawl-thei 2, Khawmhma kung 5 leh Theipui kung khat phun belh a ni bawk.

Govt. Serchhip College Principal PC. Lalremsiama chuan Serchhip-a thuthar thehdarhtute chu nimin khan College-a leng-ah sawmin he College hmasawnna hrang hrang an sawiho bakah hmasawn zelna turte an sawiho bawk.

Serchhip District-ah nimin khan COVID-19 hri kai hmuhchhuah leh enkawl dam awmin hri kai enkawllai erawh mi 7 an la awm thung.

Serchhip District chhunga Mualcheng khua chuan Mizoram Member of Parliament (MP) Rajya Sabha atana an khaw mi K. Vanlalvena thlan a nih lawmna hun nimin khan khawtlang huapin ruai nen an buatsaih.

Khum 100 awm theihna tur Serchhip District Hospital sakna tur atan Mizoram sawrkar-a Health & Family Welfare Department, Power Grid Corporation of India Limited leh Serchhip District Deputy Commissioner te chuan nimin khan thawhhona thuthlung, Memorandum of Understanding (MoU) chu an ziak fel ta.

Serchhip Sub-Hqrs. YMA huamchhunga awm Vantawng Group YMA chuan an Group huamchhungah chak zawka ruihhlo do nise an ti.

State Level Core Committee on Ruihhlo Do chu nimin khan Chairman Chief Minister Zoramthanga kaihhruaina hnuaiah Assembly Annexe Conference Hall-ah thukhawmin ruihhlo do kawnga hmalakna tur an sawiho a, he huna tarlan danin Mizoram-ah ruihhlo ngai chhinchhiah 11,432 awmin kumin aah ruihhlo vanga rilru buai enkawl mi 15841 an awm bawk a ni.

Sample Registration System (SRS), Govt. of India in SRS Bulletin, May 2022-a tihchhuah ah Mizoram chu kum 2020 chhunga Nausen kum khat hnuai lam thih tlem berna State a ni a. Nau piang sang khat zel-a thi tam lam tehna ah Mizoram-ah mi 3 thi ang niin Mizoram dawttu Nagaland-ah 4 thi ang a ni. He tehna ah hian India ramah chuan nau piang 1000 zelah 28 thi ang a ni thung.

Mizoram-a rawn zin Union Minister of State for Railways and Textiles Darshana Zardosh chuan nimin khan Commerce & Industries Minister Dr. R. Lalthangliana chu a Pisa-ah tlawhin an inkawm a, Union Minister chuan Mizo kutchhuak puan leh hnang tah hrang hrangte chu tha a tih thu leh mawi a tih thu a sawi a, Global Market-a phochhuah tlak a nih thu a sawi bawk.

Kum 2022 Chapchar Kut Souvenir ‘Nghilhloh Bu’ tih chu nimin khan CM Conference Hall ah Chief Minister Zoramthanga chuan a tlangzarh a, he hun hi I&PR Director C. Lalnunkima chuan kaihruaiin Chief Minister chuan ziakmi hrang hrang te kutchhuak tha tak tak mi tam zawkin an chhiar tura chhawpchhuah a ni chu lawmawm a tih thu a sawi a, Chapchar Kut chu a hnam ang zawnga Zofate suihkhawmtu pawimawh leh langsar ber nia a hmuh thu a sawi bawk. Chapchar Kut 2022 Nghilhloh bu-ah hian phek 127 awmin, thuchah leh Mizoram hmun hrang hranga kumin Chapchar Kut lawmna report leh hlimthla dah a nih bakah article 13 a awm a ni.

Chief Minister Zoramthanga chu nimin tlai khan Union Minister of State for External Affairs and Education Dr. Rajkumar Ranjan Singh chuan MacDonald Hall-a a chenna In ah a kawm a, Chief Minister chuan Mizoram chu ram dang pahnih nen inri-a international border thui tawk tak a neih avanga thil tam tak, a bik takin Economy leh Security lama pawimawhna a neih thu a sawi a. International relations atanga thlir a pawi-mawhna te sawi dunin, inkawlpawhna kawng, Rel kawng leh a dangte ngaihpawimawh tha an tih thu te leh hmalak theih dante an sawidun a ni. He hunah hian Ministry of Education-a MoS ni bawk Dr. Rajkumar Ranjan Singh hnenah hian Chief Minister chuan Mizorama zirna dinhmun leh zirna In tihchangtlun mamawhna te a sawipui bawk a ni.

Niminpiah khan Mizoram-ah COVID-19 hri kai mi 29 hmuhchhuah belh leh niin nimin tlai thleng khan hri kai enkawllai mi 146 an la awm.

MizoramGovernor Hari Babu Kambhampati leh Mizoram-a rawn zin Union Minister of State for Railways Darshana Jardosh-i te chuan North East Frontier Railways (NFR) in KM 51-a thui Bairabi - Sairang Rel kawng a siam mek a hmasawnna leh hmachhawp dang an sawidun.

Mizoram-a rawn zin mek Union Minister of State for Railways and Textiles Darshana Jardosh-i chuan nimin khan Chawilung-ah Mulberry leh Eri chingtute a kawm.

Serchhip-a Legal Metrology Enforcement Staff te chuan Serchhip-ah Gas buk tlinglo bur 55 manin heng te hi nimin khan thawnlet an ni. Thudawn danin heng eirawngbawlna Gas te hi AS-11/DC-9522 hmangin niminpiah khan Serchhip rawn phurh thlen a ni a, mipui lei tura semchhuahna ah a buk a tling lo nia hriat a nih avangin Legal Metrology Enforcement Staff te hian enfiahin a buk tlinglo 55 te hi hmuh a ni a, heng te hi nimin khan Company lamah thawn-let niin dan angin pawisa an chawitir an ni bawk.

Serchhip District-a Police mi 12 te chu an hna thawh that avangin nimin khan DGP’s Cash Reward hlan an ni.

Nimin tlai thleng khan Serchhip District-ah COVID-19 hri kai enkawllai mi 7 an la awm.

Serchhip Thalai Pawl (STP) chuan Mizo-ram District Hospital hrang hranga Doctor-te rualkhai zawka insemzai tul an tih thu an sawi.

Serchhip District Police te chuan nimin khan Serchhip SP Conference Hall-ah Crime Review Meeting an nei a, kumin ah Serchhip District-ah Police ten thubuai 63 ziaklut tawhin heng zingah hian a zatve aia tam chu rukruk leh a kaihhnawih thubuai a nih thu tarlan a ni.

Directorate of SCERT hnuaia B.Ed.Special Education (Hearing Impairment & Visual Impairment ) zirlaite chuan pianphunga rualbanlote zirna tih hmasawnna atana thiamna chi hrang hrang an zir te pholanna - Exhibition chu nimin khan Aizawl a SCERT Auditorium-ah an buatsaih a, tunah hian B.Ed.Special Education-ah hian zirlai (regular-a kal) 110 awm mekin Mizoram hi India ram State hrang hrang hnuaia SCERT awmte zingah leh North East India-ah Hearing Impairment & Visual Impairment inkawpa zirna nei awmchhun a ni.

School Education Minister Lalchhandama Ralte chuan nimin khan Mizoram Govt. Adhoc Aided High school Teachers’ Association General Conference Aizawl Chanmari YMA Hall-a neih chu hmanpuiin, zirna hi khawtlang mipui ta a ni tih hriat thar a ngai tih a sawi.

Agriculture Department hnuaia ‘Field Staff’ tia hriat thin, Mizoram Agriculture Subordinate Service Association te chuan nimin khan Aizawl a Agriculture Conference Hall-ah General Conference vawi 38-na an hmang a, he hun hi Agriculture Director James Lalsiamliana chuan hmanpuiin Sawrkar Flagship programme SEDP hlawhtlinna turin theihtawp chhuah a tul tih a sawi a, Fu leh Vaimim-ah hmalak mek niin beneficiary 14,000 te an hlawhtlinna turin theihtawpa puih an ngai tih pawh sawiin, Vaimim eichhetu Fall Army Worm (FAW) chu hmelhriat tawh a nih avangin a beih dan tur kan thiam a, loneitute kan zirtir ve a tul a ni, a ti bawk.

Japan International Cooperation Agency (JICA) Team te chuan ni 5 cham turin tun thla ni 23 atang khan Mizoram an rawn tlawh a, Environment, Forests & Climate Change Department in ‘Biodiversity Conservation and Forest Enrichment Project’ proposal an siam chu a hmunah rawn enfiahin mi pawimawh hrang hrangte an kawm hnuah nizan hmasa khan EF&CC Minister TJ. Lalnuntluanga chuan zanriah a buatsaih sak bawk a ni. He hunah hian Minister chuan Mizoram chu hmasawn mek a nih thu leh tuna JICA project hmang hian bung thar kan kai ngei a beisei thu sawiin, kan ramin kan mamawh em em kan tuihna humhalh leh lui dung a thing phun te hi he project hmang hian chak takin kalpui a beisei thu a sawi a. Mizoram hian he project hmang hian environment lamah hma nasa taka a sawn a rin thu a sawi bawk. JICA atanga lo kal te hi mi 7 niin Vawiin hian Mizoram an chhuahsan ang.

Niminpiah khan Mizoram-ah Sample 219 enfiah leh niin heng atang hian COVID-19 hri kai mi 21 hmuhchhuah an ni a, nimin tlai thleng khan Mizoram-ah COVID-19 hri kai enkawllai mi 135 an awm a ni.

Nimin khan Health Minister Dr. R. Lalthangliana hovin HIV/AIDS dona kawnga inrawnkhawmna neih a ni.

Mizoram-a Peace Accord MNF Returnee Association (PAMRA) hruaitute chuan nimin khan Chief Minister Zoramthanga chu kawmin an harsatna te an thlen.

Rural Development Minister Lalruatkima chuan nimin khan Mizoram University-ah ni hnih awh tur ‘National Seminar on Local Government & Management in North-East India’ chu a hawng a, he hunah hian RD Minister chuan Local Government hi hmasawnna hna thawh kawngah a bulthuta awm an nih avangin an pawimawh tih sawiin, Local Government enkawl dan leh kaihhruai dante hi felfai tak leh mumal taka duan a ni a, heti chung hian induhkhawp tawk a har thin a, hemi puala National Seminar neih a ni hi a tha zawngin min nghawng ngei ang tih a beisei thu leh lawmawm a tih thu a sawi bawk.

Ramri hrula Project Pushpak in kawng siam hna thawh meka hnathawh enkawltu Border Roads Organisation (BRO) hnathawk mi pali te chu nimin khan Mizoram Governor Hari Babu Kambhampati chuan chawimawina a hlan.

BCA ADMISSION OPEN Govt. Serchhip College

Mizoram-a rawn zin mek Union Minister of State for Railways and Textiles Darshana Jardosh-i chuan nimin khan Serchhip District-a Thenzawl khua tlawhin Mizoram Handloom Export Facilitation Hub-a Samarth Training Programe a hawng a, Thenzawl-a khualzin ten an tlawh thin hmun hrang hrangte pawh a tlawh nghal bawk a ni.

Serchhip NGO Coordination Committee chuan Serchhip-a Doctor thawklai sawnchhuah chungchanga an thilphut te chu Health Minister hnenah thlen nise an ti.

Serchhip District-ah African Swine Fever (ASF) avanga Vawk thi a awm ve leh ta a, hei vang hian Bawktlang khua chu Vawk hri lenna khua ah puan a ni bawk.

Nimin khan Serchhip District-ah COVID-19 hri kai mi pathum hmuhchhuah belh leh niin hri kai mi 3 te anmahni enkawlna hmun atanga chhuahtir an ni bawk.

Nimin khan Champhai Police, Chalbawia Junction, Khankawn Checkgate-a duty te chuan nungcha Dan lova Mizoram-a lakluh chi hrang hrang 468 an man a, a neitu nia inchhal chu Gospel Chanchinthaa (28) Lawngtlai leh a phurtu mi 4 te pawh man nghal an ni. Heng an thil man te hi Satel 4, Rul 11, Laiking 442, Samuang 4, Bui 2, Sanghar 1 leh Sahuai 4 niin tun thla ni 9 khan ramsa leh Sava 23 man a lo ni tawh bawk a ni.

Nimin khan Rural Development Minister Lalruatkima hovin a Pisa-ah Khawzawl, Thingsulthliah leh East Lungdar RD Block huamchhung khaw hrang hranga Shyama Prasad Mukherjee Rurban Mission (SPMRM) hnuaia hmasawnna hna hrang hrang atana ruahmanna duan te thlirhona neih a ni a, SPMRM hian heng RD Block 4 hnuaiah khaw 48 huamin he ruahmanna hnuaiah hian hmasawnna hna chi hrang hrangte thawh thin a ni.

Mizoram Pradesh Youth Congress Committee (MPYCC) chuan damlote pawisa hmuh let tur Medical Reimbursement (MR) bill pek theih loh chungchangah nimin khan Mizoram Health Care Society Office chu an tlawh a, Health Care Bill-a cheng vbc. 71 chuang tang mek avanga mipuiin harsatna an tawh chungchang thawktute sawipuiin, Sawrkarin damlote pawisa bill a bat zat hi April ni 30, 2022 thlengin Rs. 712,184,104/- a nih thu an sawi a ni.

Mara Autonomous District Council (MADC) 12-na a Chief Executive Member (CEM) atan Phura bial atanga thlantlin H. Malvina chu nimin Siaha District Fast Track Court Judge Lal-ngaihmawia Zote chuan rinawmna thu tiamtirin a lalut a, CEM hian a thawhpui tur EM te chu Governor pawmpui turin a thawn nghal bawk.

Lawngtlai District Police Force chuan tunkar Thawhtanni khan Forensic Team an din thar a, hemi atan hian ASI, Head Constable leh Constable pakhat theuh te chuan Forensic Science Laboratory, Aizawl-ah pawikhawihna hmuna kutze thla lak dan te, finfiahna dang lak dan leh Forensic Science te an zir a ni. Dan bawhchhiatna leh pawikhawihna thlengah kutzia leh finfiahna (forensic evidence) zawn leh lak a tul changin Forensic Team mamawhna a sang a. Mizoram-ah Forensic Science Laboratory pakhat chauh a awm avangin leh Aizawla awm a nih avangin Lawngtlaiah District Police Forensic Team te hi tangkai hle tura beisei an ni.

New Delhi-a cham mek Deputy Chief Minister Tawnluia chuan Union Home Secretary Ajay Kumar Bhalla chu niminpiah khan a Pisa ah hmuin Aizawl-a Assam Rifles te Zokhawsang-a an insawn tur chungchang a sawipui a, Assam Rifles lamin remchan lohna eng engemaw an neih te enfel turin Aizawl-ah ngei Ministry of Home Affairs huaihawtna hnuaia meeting neih a rawt bawk. Union Home Secretary Ajay Kumar Bhalla chuan Assam Rifles te insawnchhuah nan engkim peihfel a nih tawh thu sawiin, Deputy Chief Minister rawtna chu tha tiin, Meeting chu June thla chhunga neih nghal a nih tur thu in a chhang a ni. Hei bakah hian Deputy Chief Minister chuan Smart City hnuaia Lammual bula Laldenga Cultural Centre sak anih tur leh tan hma a ngaih thu a sawi bawkin Union Home Secretary hian tan nghal theih anih thu a hrilh bawk a ni.

Niminpiah khan Mizoram-ah Sample 405 enfiah leh niin heng atang hian COVID-19 hri kai mi 23 hmuhchhuah an ni a, Sample enfiah atanga chhutin za zela 5.68 te chuan hri an kai a ni.

Mizoram Public Service Commission (MPSC)-in kum 30 a tlin puala tihchhuah Coffee Table book ‘A saga of three decades’ tia vuah chu nimin khan Planning Board Vice Chairman H. Rammawi chuan a tlangzarh.

Agriculture Department buatsaih ni hnih (2) awh State Level Agriculture Officers’ Meet chu nimin khan zawhfel niin Agriculture Minister C. Lalrinsanga chuan a hmanpui a ni.

Mizoram Rural Bank (MRB) Branch100-na tur MRB Electric Veng Branch chu nimin khan Governor Hari Babu Kambhampati chuan a hawng a, he Branch hi India rama a hmasa ber pawl ni turin Micro, Small and Medium Enterprises (MSME) Ddedicated Bank Branch a ni dawn a ni.

Mizo Zirlai Pawl (MZP) General Hqrs. chuan High School Leaving Certificate (HSLC) Exam result tihchhuah taka Top 10-a lang Mizo zirlaite chawimawina hun nimin khan Aizawl-a Vanapa Hall-ah an buatsaih.

Serchhip District Bawrhsap Nazuk Kumar IAS chu nimin khan Serchhip District Bharat Scout & Guides President atan lakluhna neih a ni.

Serchhip-a Private School pakhat, Goodwill English Academy (GEA) chuan kumin a High School Leaving Certificate (HSLC) Exam result tihchhuah taka an School atanga zirlai Exam zawng zawng an pass lawmna hun nimin khan neiin he hun hi Serchhip DEO Lawmawma chuan khuallian niin a hmanpui a ni.

Serchhip District-ah COVID-19 dinhmun in ziaawm lam pan ve hret hret zelin khaw pathum ah hri kai enkawllai mi 7 an awm mek. Nimin khan Serchhip District-ah COVID-19 hri kai hmuhchhuah thar an awm lova, hetihlai hian hri kai enkawllai mi pathum te chu anmhni enkawlna hmun atanga chhuahtir an ni ve leh thung a ni. 

Nizan hmasa khan Chawngte ah tualthahna thlengin mi pakhat a thih bakah midang pakhat in hliam a tuar. Thudawn danin nizan hmasa dar 9:00 vel khan B. Ushaton Chakma, Tatamoni tia hriat chu Kamalanagar-II a khawlai-ah hriamhrei nen inhrosa in an thenawm a mi CADC-a MDC Kusum Lota Chakma-i chu a bei a, Rajiv Chakma (36) chuan thelh a tumna lamah nunna chanin Kusum Lota Chakma hian hliam a tuar bawk a ni.

Nimin khan Kolasib-ah District Level SEDP Committee chu thukhawmin May 30, 2022 ral-hmain Village Level SEPD Committee-ten SEDP hnuaia hamthatna dawng thei tur hming thehluh a tul thu tarlan a ni a. Kolasib District-ah hian Assembly bial 3 awmin bial tinah Village Level SEDP Committee kaltlangin chhungkaw 1500 theuh thlanchhuah tur a ni a. State leh Central Government hnuaia hnathawk nghet awmna chhung-kua a huam dawn lo a, SEDP hnuaia a nihna tur anga hma la tha lo te chu hamthatna pek chhunzawm an ni dawn lo a ni.

Irrigation & Water Resources Minister C. Lalrinsanga chuan nizan hmasa khan Aijal Club-ah Japan International Cooperation Agency (JICA) hotute pualin mikhual pawimawh te pualin Cultural Programme leh Zanriah a buatsaih a, he hunah hian JICA hotute nen Mizoram leh JICA thawhhona hnuaia hnathawh mek te bakah Project thar pawimawh tak taka thawhho theih dan tur an sawiho a ni. JICA leh Mizoram sawrkar hian August 2017 atang khan kum 5 atan thawhhona an kalpui tawh a ni.

Former Legislators Association of Mizo-ram (FLAM) hruaitute chuan Mizoram Assembly Speaker Lalrinliana Sailo chu tunkar Thawhtanni khan a Pisa-ah hmuin tun thla ni 9 leh 10-a Mizoram Legislative Assembly Golden Jubilee lawm chungchangah Letter of Appreciation hlanin lawmthu an sawi bawk a. He hunah hian FLAM President Liansuama chuan Speaker hnenah Letter of Appreciation hi hlanin, Mizoram Legislative Assembly Golden Jubilee lawmnaa FLAM Member te dah pawimawh an ni chu lawmthu a sawi a. Golden Jubilee hlim tak leh hlawhtling taka lawm a nih chungchangah Speaker, Deputy Speaker leh Assembly Secretariat Officer leh Staff zawng zawngte thawhhona tha leh thawhrimna vang a nih thu a sawi bawk.

Niminpiah khan Mizoram-ah COVID-19 hri kai hmuhchhuah pung leh hretin hri kai mi 45 lai hmuhchhuah belh leh an ni.

Mizoram Samagra Shiksha leh Central YMA te chuan nimin khan School Education Minister Office Chamber-ah School Education Minister Lalchhandama Ralte hriatpuina in thawhdunna thuthlung an ziak.

Mizoram-a District Rural Development Agency te (DRDA) te District Rural Development Office (DRDO)-a let tura Cabinet Memorandum buatsaih chhin chu nimin khan RD Minister Lalruatkima hovin sawrkar mi pawimawh ten an thlirho.

Rural Development Minister Lalruatkima chuan tate Civil Service te chu State hmasawnna leh hmalam hun atan pawimawhna thuk tak an nei tih hre thar leh turin a chah.

Health Minister Dr R. Lalthangliana chuan nimin khan Civil Hospital, Aizawl-ah CT Scan khawl thar leh 500 LPM Oxygen Plant thar a hawng.

Union Minister of State for Railways & Textiles Darshana Jardosh-i chuan tunkar Inrinni thleng Mizoram a cham turin nimin khan Aizawl a rawn thleng a, Chief Minister a kawm hnuah Vawiin hian Serchhip District-a Thenzawl khua tlawhin khualzin mite hmun pawimawh a tlawh nghal ang.

Mizoram-a Doctor thenkhat te chu an awmna siksawi niin Serchhip District Hospital-a thawk Doctor pahnih sawnchhuah an ni a, Doctor dah belh erawh an awm lo thung.

Serchhip-a Petrol Pump awmchhun PB. Lal-zuithanga Filling Station chuan tunkar chhung hian Petrol a rawn thlen an beisei tih an sawi a, niminpiah khan Guwahati-a Petrol phur tur Motor an in tirh tawh thu sawiin, Vawiin lam hian load lak theih an in beisei tawh thu an sawi a, harsatna dang in a tlakbuak a nih loh chuan tunkar tawp lamah chuan Petrol hi a rawn thlen an beisei tih an sawi a ni.

Nimin khan Serchhip-ah SEDP kalpui zel dan tur inzirtirna leh sawihona neih a ni a, SEDP tanpuina dawng turte hi Village Level-a Committee te chu thla thar, June 10, 2022 hmaa thlang tura tih an ni.

Nimin tlai thleng khan Serchhip District-ah COVID-19 hri kai enkawllai mi 10 an awm.

MIZOFED Serchhip Branch chuan mipuite hman theih turin eirawngbawlna Gas, kg. 10-a rit, Indane Composite Cylinder, Smart Cylinder an tih bawk chu hman theih turin an chhawpchhuak ta a, a duh apiang tan khul theih a ni ang.

Mizoram ti hring tura thingphun beihpui thlakna ni, Green Mizoram Day chu thla thar June 10 khian Serchhip District-ah pawh hman leh a ni dawn a, kum hmasa lama thing lo phun tawh te pawh enkawl zui tura ngenna siam a ni ang.

Congress Thalai, MPYCC chuan tunhnai ah Myanmar leh Mizoram State pawn atanga ramdang tharchhuah Dawnfawh (Watermelon) chawkluh nasat avangin Mizoram chhung ngeia kan tharchhuah Dawhfawh te hralhna a hnawng mek niin nimin khan thuchhuah siamin an tarlang a. Hei vang hian Dawnfawh thar hnem Lamzawl khua, Saitual District chuan an Dawn-fawh tharchhuah tihralna ah harsatna an tawk nasa nia sawiin, “Kan ramchhung thlai thar te heti taka a hralhna ngaihsak hlawh a ni lo ta zel mai hi thil vanduaithlak tak a ni,” an ti bawk.

ZPM Working President K. Sapdanga chuan Mizoram-in politics rahbi chhe tak a rah mek thu nimin-a Aizawl-a an Party Office Chhung Inkhawm neih ah sawiin, “Mahni dikna chanvo puangchhuak ngam mang lo khawpa inrahbehna a awm a, hei hi kalphung thar din kan mamawhna chhan pakhat a ni,” a ti a. “Kan party inkaihhruainaah chuan ‘Politics khelh dan thianghlima khelh tur’ tih a awm a; chuvangin, kan nitin khawsak phungah thianghlim leh felfai taka politics kalpui a ngai a, Sakhua leh politics hi dik leh tha takin a kalkawp thei a ni,” a ti bawk.

Congress Party chuan Champhai District a Zokhawthar-ah Congress VC thar a piang tih an sawi a, Seat 7 awmna Zokhawthar VC-ah hian MNF leh Independent ten Seat 3 ve ve neiin Congress Party in Seat khat an nei a, Independent a thlantlin VC Member 3 te hian Congress Party an zawm ta niin an tarlang a ni.

Lawngtlai District chhunga puakthei thil hman phalna nei (explosives licence holder) leh Silai leh a mu zuar (arms & ammunition dealer licence holder)-te chu nimin khan Addl. DC James Miahlung hovin DC Conference Hall-ah an thukhawm a, Dan leh hrai leh hriat tur pawimawh hrang hrang inzirtirna leh sawihona an nei a ni. Lawngtlai District chhungah hian tun dinhmunah puakthei thil hman phalna nei (explosives licence holder) mi 14 awmin, lung lakna (quarry)-a hman tur a ni tlangpui a. Silai leh a mu zawrh phalna nei (arms & ammunition dealer licence holder) mi 2 an awm bawk a ni.

New Delhi-a cham mek Deputy Chief Minister Tawnluia chuan nimin khan Ministry of Housing and Urban Affairs Secretary Manoj Joshi chu New Delhi-a a Office-ah hmuin SIPMIU Project chungchang a sawipui a, he hunah hian Deputy Chief Minister chuan SIPMIU Project chu March 2022-a a tawp tak avangin 37 MLD Project laklawh taka awm chu Aizawl khawpui a tui pek nan a pawimawh thu Union Secretary hnenah a hrilh a, hemi zawhna tur Fund chu Mizo-ram sawrkarin a hmuh ngei an beisei thu a thlen bakah SBM 2.0 leh Amrut 2.0-a Mizoram sawr-karin hmalak an tum dan leh Ministry in chak taka hma an lakpui a ngaih thu a thlen bawk. Union Ministry lam hian he Project a zawh theih nan hian sum la mamawh te pek ngei an tum thu Deputy Chief Minister hi an lo hrilh a. Union Secretary hian kawng engkimah theihtawp an chhuah zel tur thu a sawi bawk a ni.

Pathianni khan Mizoram-ah Sample 77 enfiah niin heng atang hian COVID-19 hri kai mi 11 hmuhchhuah an ni a, Sample enfiah atanga chhutin za zela 14.29 te chuan hri an kai a ni.

Myanmar mi Mizoram-a rawn raltlan mi sing thum velte chu chhinchhiaha Identity Card siam sak an nih hnuah ID Card pekchhuah an ni tawh.

Chhiatna chi hrang hrang a lo thlen thulha a tul anga puitu tur ‘Chhiat tawk te thian’ Aapda Mitra Training hmasa ber chu nimin khan Mamit District tan State Training Centre, Tanhril-ah neih tan a ni. 

Health Minister Dr. R. Lalthangliana chuan Mizoram-a Covid vei thi zinga zaa 80 vel chu natna benvawn nei an ni tih sawiin, Covid thihpui tak chu zaa 20 vel an nih thu a sawi.

School Education Minister Lalchhandama Ralte chuan Mizoram sawrkar chuan zirna a ngai pawimawh em em tih sawiin, sawrkar School-a lut duh naupang an pung zel tih a sawi a, hmun thenkhatah phei chuan Dawhkan siam belh hial a ngai tawh tih a sawi bawk.

International Day for Biological Diversity chu nimin, May 22, 2022 khan khawvel hmun hrang hrangah hman niin Thenzawl Forest Division pawhin he ni pual hian Thenzawl-a Jawahar Navodaya Vidhyalaya (JNV) te nen hun an hmang a ni.

Inrinni khan Lumtui Zau FMC te chuan Lalpuithanga Hall, Serchhip Chhim Veng-ah Assembly neiin MJA Serchhip District te kaihhruaina hnuaiah kum 2022-2023 chhunga hruaitu tur thlanna an nei a, President-ah C. Lalramzauva (Bazar Veng); Vice President-ah Lalnunsiama Pachuau (AOC Veng) leh Treasurer-ah Zomuanpuia (Bazar Veng) te thlan an ni a, heng mite hian an thawhpui tur Secretary leh a dangte an la ruat ve leh ang. Lumtui Zau hi Serchhip Mat Phai khawchhak lam hnaiha awm niin an huam-chhungah hian Leilet nei chhungkaw 40 vel an awm mek a ni.

Serchhip Police te chuan Zirtawpni zan khan Keitum leh Khawlailung inkar Tuichang lui kamah Heroin No. 4 Hawng 6 manin hemi kaihhnawih ah hian mi pahnih pawh man nghal an ni.

Christ Redemption Church (CRC) chuan Zirtawpni zan atanga nimin Pathianni thleng khan Serchhip Field Veng-a an Kohhran Biak In-ah kum 2022 Kohhran Hruaitute tan Training Programme an buatsaih a, Mizoram hmun hrang hrang atangin Kohhran hruaitute telin Kohhran inkaihhruaina leh hruaitute mawhphurhna an zirho a, nimin-ah an Kohhran General Hqrs. hruaitute hnen atangin Pathian thuchah ngaihthlak a ni bawk.

Serchhip District-ah COVID-19 dinhmun in ziaawm lam a pan ve rih zel a, nimin tlai thleng khan hri kai enkawllai mi mi 11 an awm a ni.

Serchhip-ah Petrol harsa zelin nimin thleng khan Petrol Pump hrang hrangah Petrol lak tur a awm mumal tawh lo.

ZPM Thalai Hqrs. chuan kum 2022 atâna an project thupui, 'Zoram chhanchhuah Project' hawnna chu Inrinni khan Aizawl South-III bial huamchhûngah an nei a, he hunah hian ZPM Thalai hruaitute chuan Sailam khua atanga tanin Aizawl South-III khaw hrang hrang an fang a, heng khua an tlawh ah te hian lehkha ziak te an sem bakah mi In-ah te lutin Campaign an nei a, an kalna apiangah Party mi ten lo dawngsawngin, mipui ten an lo hlut hle niin thuchhuah siamin an tarlang bawk.

Zo Reunification Organisation (ZORO) chuan Zirtawpni khan kum 2022-2025 chhunga hruaitu tur thlanna neiin President-ah R. Sangkawia leh Vice President-ah Rohmingthanga Colney, F. Ngurbiakvela, Moses Lalramchhana, R. Lalchhuana leh Lalmuanpuia Punte bakah Treasurer-ah Raymond Zothangliana te an thlang a, an thawhpui turte an ruat leh ang. He hunah hian ZORO President R. Sangkawia chuan ZORO tum ber chu khawvel sawrkar pathum-a thendarh Zofate rorelna pakhata insuihkhawm leh a nih thu a sawi a ni.

Inrinni khan Mizoram-ah COVID-19 Vaccine Dose 291 pekchhuah leh niin heng te nen hian Mizoram-ah COVID-19 vaccine pek tawh zawng zawng chu Dose 16,05,102 a ni a, mi 8,57,648 te hnenah Vaccine Dose 1-na pe tawhin an zinga 7,01,28 te hnenah Dose 2-na pek fel a ni tawh a, mi 46,174 te chuan Precautionary dose an la tawh bawk a ni.

Khawzawl Police te chuan Zirtawpni zan khan Khawzawl Police Check Gate-ah Truck ke 12 nei pakhat atangin leitha, Urea Bag 500 an man a, Truck Driver hi thu zawhfiah tura lak nghal a ni. He Truck hi Vapar khaw mi ta niin Truck Driver Thangsiankhai (26), Champhai Bethel Veng chuan Urea hi Vairengte atanga rawn phur in Mualkawi a dah tur a ni tih a sawi a, thubuai ziahluh nghal a ni. Vairengte Police te leh Phainuam-a tlawmngai pawl te pawhin Ningani zan khan Dan lo leh Permit tel lova Silchar atanga Mizoram-a lakluh Urea bags 210 an man bawk a, a phurhna atana hman Truck pathum pawh man nghal a ni bawk.

Central Young Lai Association hruaitute leh Doctors without Borders India Private Limited (DWBI) te chu Zirtawpni khan Lawngtlai-ah inkawmin Lawngtlai District chhunga thawhho dan tur leh hmalakna tur hrang hrang an sawiho a, thawhhona tur an sawi zingah Lawngtlai District chhunga chengte tui leh thianghlimna leh hriselna lama chhawmdawlna tur leh hemi kawnga mumal zawka hmalak dan tur leh Central YLA in hma-lakna a lo neih tawhte chhawm nun zel nise an ti a. Thawhhona tur inremna hi hun remchang hmasa berah ziah a ni ang. Doctors without Borders te hian an tum ber chu Rambuai avanga harsatna tawk, tui leh thianghlimna leh hriselna kawnga an dinhmun chawikan a ni a, khawvel hmun hrang hrang 77 chuangah Sawrkar leh tlawmngai pawl hrang hrangte nen an thawkdun mek a ni.

Mizoram-ah COVID-19 hri kai enkawllai an tlem ve leh hret hret a, nimin tlai thleng khan Mizoram-ah hri kai enkawllai mi 129 an la awm a ni.

Plastic hman tawh tangkai zawka hman a nih theih nana New Champhai PHE Complex-a Plastic sawngbawlna khawl, Plastic Waste Resource Management Centre din chu PHE Department Secretary Er. Lalmuanzova chuan Zirtawpni khan a hawng.