Mizoram Samagra Shiksha leh YMA thawkdun dawn

Mizoram Samagra Shiksha leh Central YMA te chuan nimin khan School Education Minister Office Chamber-ah School Education Minister Lalchhandama Ralte hriatpuina in thawhdunna thuthlung an ziak.

Samagra Shiksha leh Central YMA thawhhona thuthlungah hian YMA-in School kai rual kai lo dapchhuaha School kai tura fuih te, naupang rualbanlote laka rilru puthmang dik lo siamthat te, YMA Group, Sub-Hqrs. leh General Conference-ah zirna chungchang inhrilhhriat te, zirlaiten ngaihsan tur dik an ngaihsan a, hnualsuat tur dik an hnualsuat theih nana thawhho te, Branch YMA-in hnam ziarang pawimawh an huamchhung zirlai naupangte zirtir thin te a tel a, thawhhona thuthlung hian March 31, 2024 thleng a huam dawn a ni. 

School Education Minister chuan kum 2007 atanga Samagra Shiksha leh Central YMA-in zirna kawngah thawhhona an nei chho zel chu lawmawm a tih thu a sawi a. YMA kumpuan ram leh hnam humhalh ah a point pawimawh ah zirna uar tih telh a ni chu lawmawm a tih thu sawiin, Sawrkarin zirna In leh zirtirtu tha a neih theih nan hna a thawk tih a sawi a, hna lakah pawh a thiam thiam lak an ni a, a theih chin chinah an thawhna hmuna awm tha duh tur, a khaw mi emaw, a khaw thenawm te emaw lak an nih theihna turin kawng thar ngaihtuah a ni tih a sawi. He hunah hian Central YMA President R. Lalngheta chuan YMA-in zirna a ngaih pawimawh thu leh nikum lamah phei chuan kumpuan-ah hman a nih dan te a sawi bawk.