Mizo Zirlai Pawl (MZP) General Hqrs. chuan High School Leaving Certificate (HSLC) Exam result tihchhuah taka Top 10-a lang Mizo zirlaite chawimawina hun nimin khan Aizawl-a Vanapa Hall-ah an buatsaih.
HSLC-a Mizo Zirlai tithate chawimawina hun hi Chief Minister Zoramthanga chuan hmanpuiin HSLC Topper te chu a lawmpui thu leh tun-a hlawhtlinna an chan chu duhtawk mai lova, zirna sang zawk an zir hunah theihtawp chhuah zui zel turin a fuih a. Eizawnna kawng an zawhna ah tuina, thiamna leh theihna a inan vek theihloh thu sawiin, eng kawng pawh zawh ila, mi tangkai ber ni thei turin kan inzir a pawimawh thu a sawi bawk a ni.
He hunah hian MZP General Hqrs. President Lalnunmawia Pautu chuan thalaite leh zirlaite chu ngaihsan tur dik leh ngaihhlut tur dik ngaihlu tura chahin, Social Media a thu puarpawleng mai mai buaipui lo turin a chah a. Mizoram humhim tura MZP in theihtawp a chhuah reng tur thu sawiin, “Pukzing ram satthla-a Chakma leh Tuikuk kut-a pek tumna awm hi a tawp thlengin kan dodal zel dawn a ni,” a ti bawk.
Nimin-a Zirlai tithate chawimawina hunah hian HSLC 2022 Top Ten-a Mizo zirlai tling mi 14 te chawimawi an ni a, chawimawina thuziak leh tangkafai bakah zirlaite tana tangkai tur lehkhabu chi hrang hrang an hlan a ni.
Comments
Post a Comment