MZP Federal Council Sitting vawk 54-na neih a ni

Mizo Zirlai Pawl (MZP) chuan nimin khan MZP Rorelna sang, Federal Council Sitting vawi 54-na neiin Mizoram-a zirna chungchanga hmalakna tur hrang hrang an rel.

MZP Federal Council Sitting hi Aizawl a MZP Conference Hall-ah neih niin an pawl Vice President Andrew F. Lalramnghaka chuan a kaihruai a, Mizoram puma zirna in hma a sawn theih nan sawrkar enkawl School leh College zirtirtu leh zirlai awm dan zirchian a hmalak an rel bakah National Institute of Open Schooling (NIOS) hnuaia zirlaite harsatna, Fees leh Result chungchang sutkian anih theih nan hmalak an rel a, Mizoram sawrkarin School zirtirtu, Transfer & Posting Rules a neih mek chu a taka hman anih theih nana hmalak an rel bakah Sawrkarin zirtirtu hna a lakah a tling leh tlak (Qualified) ngei lak anih theih nan hmalak nise an ti a. Sawrkar hna thar lak reng reng ah dik taka lak anih theih nan hmalak an rel bakah Mizo mipuite’n eirawngbawlna Gas Subsidy chungchangah harsatna an tawk fo tih sawiin, chinfel a nih theih nan hmalak an rel bawk a ni.

He hunah hian Federal Council Sitting House Leader leh MZP General Hqrs. President Lalnunmawia Pautu chuan MZP chu Zirlai Pawl a nih angin, an pawl thiltum leh nihphung an chian a pawimawh thu a sawi a, “Hruaitu nih duh vang chauha MZP a inhmang ni lovin, zirlaite harsatnaa sutkian puitu, zirlaite lamtang kan ni reng tur a ni,” tiin he huna tel te chu a fuih a. Zofate chenna hmun Zofate'n kan chan/hloh zel loh nan leh kan humhim zel theih nan MZP chuan theihtawp a chhuah zel dawn tih pawh sawiin, “MZP chu sawrkar do ngawr ngawr tur kan ni lova, thiltha an tih chuan sawrkar thawhpui tur leh an kalsual tur venga an tih dikloh te dodal tur kan ni a. Kan hmalakna reng rengah kan ram leh hnam himna kan dah pawimawh hmasa ber tur a ni. Zirlaite hi rilru fim tak pu tur kan ni a, politics thli chhia leh inchirhthehna lak atangin i fimkhur ang u,” a ti bawk.