District Hospital ah rualkhai zawka Doctor dah duh

Serchhip Thalai Pawl (STP) chuan Mizo-ram District Hospital hrang hranga Doctor-te rualkhai zawka insemzai tul an tih thu an sawi.

Nimin-a thuchhuah an siamah Serchhip Thalai Pawl chuan tunhnaia Mizoram sawrkarin Doctor a sawn kualna ah Serchhip District Hospital-a thawk lai, Dr. Laltharzeli Fanai, Gynecologist leh Dr. K. Vanlalhriati, Padaetrician-te sawnchhuah an nih chungchangah Serchhip District Hospital-a thawk lai Dr. C.Lalrinzama chu Gynecology zir zo-in Serchhip District Hospital-a awm chhunzawm tura tih a nih avangin Gynae Doctor hna thawk chhunzawm tura an ngaih thu leh Paediatrician sawnchhuah a thlaktu dah nghal a ni lo erawh tha lo an tih thu an sawi a. Hemi chungchanga NGO Coordination Committee hmalakna chu a tawp thlengin an thlawp tlat dawn tih an tarlang.

STP chuan Mizoram District Hospital hrang hranga Doctor-te rualkhai zawka insemzai chu a tul takzeta an hriat thu sawiin, Doctor transfer & posting order tihchhuah apianga lungawi lohna thawm hriat tur awm thin hi Doctor transfer & posting kalphung mumal awm loh vang ni ah an ngaih thu an sawi a. District Hospital tinah Specialist Doctor post nghet siam chu thil tul hmasa nia an ngaih thu pawh sawiin, “Doctor transfer & posting chungchangah pawh hian kalphung mumal tak neih hi thingtlang mipuite leh Doctor tam takte harsatna sutkianna tur niin a lang a, hemi tur hian sawrkar hian hma la se kan duh hle bawk a ni,” an ti.

Sawrkar hnathawkte chu Transfer theih an ni tih pawh Serchhip Thalai Pawl te chuan sawiin, “Sawrkarin an dahna hmun apianga awm tur an nih laiin, an aiawh dah lova transfer an ni thin hian mipui harsatna nasa tak a siam thin a, a bik takin Doctor-te transfer bikah phei chuan hetiang hi thleng tawhlo se kan duhin sawrkar pawh kan ngen a ni,” an ti bawk.