Sangha bomb thu-ah mi 4 thiamloh chantir an ni

Phaizau khua ten an humhalh Saitlan li/Ngawi dawh li-a phalna nei lova Bomb hmanga Sangha man a puh, Mamit bialtu MLA H. Lalzirliana leh a thawhpui mi 11 zinga palite chu May 20, 2022 khan Court-in thiamloh a chantir a, an chunga hremna lekkawh dan tur chu thla thar June 3-ah puan a ni ang.

Hemi chungchanga Court thuremnaa tarlan a nih danin November 29, 2020 khan Phaizau VC leh NGO te thuchhuah intawm chu Social Media-ah a darh a, chutah chuan H. Lalzirliana MLA leh a thawhpui mi 11-te chu ni 21.11.2020-ah Tut lui-a Saitlan li/Ngawi dawh li, khawtlang humhalh laiah phalna nei lova bomb hmanga Sangha an man avangin Rs. 10,000 chawi tura phut an ni a. Hemi chungchang hi chanchinbu hrang hrangah a lan bakah Environment humhalhtu pawl pahnih ASEP leh BICONE te pawhin demna thu an chhuah bawk.

Hemi chungchang hi Forest Department chuan a chhui chiang nghal a, he thil thlenna hmun hi Reserved Forest huamchhung a nih avangin MLA leh a thuihhruaite hian Section 23 (1) leh 24 (6) Mizoram (Forest) Act, 1955 an bawhchhe ngei niin an hria a. DFO Mamit chuan complaint thehlutin Court-in complaint a dawn ni chu 14.12.2020 a ni a. Thubuai ngaihtuah laiin sawrkar thuhretu mi pali thu zawhfiah an ni a, thubuai neite chuan thuhretu an nei lo thung a. Thubuai neite chu Sec. 313 Cr. PC hmangin insawifiahna hun siamsak an ni a, an vaiin puhna zawng zawng an phat vek laiin, insawifiahna emaw an tih lohzia finfiahna emaw engmah an sawi lo thung.

Court-in a zirchian hnuin ni 21.11.2020-ah H. Lalzirliana MLA leh a thawhpui mi 11-te chu Tut lui-ah an kal ngei a, an zinga mi thenkhat chuan Saitlan li/Ngawi dawh li-ah kalin gelatine hmangin Sangha an bomb ngei tih an pawm a, Sangha bomb-na hmun hi Reserved Forest chhung ngei a ni tih finfiah a ni bawk. VC leh All NGO phut angin accused thenkhat chuan chawi tura phut Rs. 10,000 an pe ngei a, sum petute hi Hreuthangpuia, Chuauthantluanga, Lalrikhuma, Lalchawimawia leh Chanchinmawii te an ni.

Khawtlang in pawisa chawi tura an tih, thuawih taka pawisa lo chawitute chu puh an nihna court-in pawm tlakah ngaiin thiamloh a chantir (convict) a. Pawisa chawi tura an phut an pek chhan chu phalna lova bomb hmanga sangha an man nia puhna an pawmzia lantirnaah Court chuan a ngai a, pawisa chawitute zinga tel Chanchinmawii chu Saitlan li/Ngawi dawh li-a a kal thu leh Sangha a bomb ve thu a lang lo a, chumi vang chuan thiam loh chantir zingah a tel ve lo thung. Court chuan chanchinbua thuchhuah te, pawl thenkhat Press Release te leh Social Media hmanga thuchhuah te chu thubuai neite thiamloh chantirna tur chhan tlingah a ruat lo a, chuvang chuan finfiahna tha tawk awm lo nia ngaiin benefit of doubt a pe a, thiamloh chantir mi palite bak mi dang pariatte chu thiam a chantir a ni.

Comments

Popular posts from this blog

Bialtu MLA in Laptop pe