Union Minister of State for Railways and Textiles-in Thenzawl-ah Samarth Training a hawng

Mizoram-a rawn zin mek Union Minister of State for Railways and Textiles Darshana Jardosh-i chuan nimin khan Serchhip District-a Thenzawl khua tlawhin Mizoram Handloom Export Facilitation Hub-a Samarth Training Programe a hawng a, Thenzawl-a khualzin ten an tlawh thin hmun hrang hrangte pawh a tlawh nghal bawk a ni.

Mizoram-a cham mek Union Minister of State for Railways and Textiles Darshana Jardosh-i hian nimin khan Aizawl atanga Thenzawl panin Mizoram Handloom Export Facilitation Hub, Thenzawl-ah Sericulture Minister Dr. Beichhua bakah Serchhip DC Nazuk Kumar leh SP Stephen Lalrinawma te chuan an lo dawngsawng a, helai hmuna Handloom lama eizawng ten thiamna (skill) an neih theihnana hmalakna Programe, Samarth chu hawngin Handloom lama kan kutchhuak-ah quality lamah hmasawn tura tan lak zel a pawimawh tih a sawi a, daihrei leh tlo tur kan ngaihtuaha, International Market thleng phak turin Handloom Industry neitu leh thawktu te chu a fuih a. India sawrkar chuan Handloom lam mai bakah Handicraft lamah nasa zawka tan lak zel a tum thu sawiin, tualchhung a eizawnna neih belh zel tura ngaihtuahna sen a tul thu a sawi a. State lian lo tak Mizoram-ah puantah leh thiam hnangdeh (Handloom & Handicraft Sector) a pawimawh zual thu pawh sawiin, Kut themthiamna hmanga eizawngtute chu mahni kutke-a dinga mahni inpuih hmasak tum thin turin a fuih a. Mizoram mai nilo ramchhung hmun dang leh pawn thlengpha thei tura thil siamte cheibawl kawnga ruahmanna neih a ngaih thu sawiin, hralh kal thei tur ngaihtuah chhuah tum turin a chah bawk.

Samarth Training Programe hawnna ah hian Serchhip District Bawrhsap Nazuk Kumar chuan inlawmna thu sawiin S. Bandyopadhya, Director (EZ), WSC, Guwahati chuan hetiang hun an buatsaih chhan leh an hmalakna hrang hrangte a sawi a, Samarth Training Programe hnuaia trainee te nen inkawmna hun hman niin Trainee te hnenah hian Pehchan Cards leh Yarn Passbook hlan nghal an ni.

Union Minister of State for Railways and Textiles Darshana Jardosh-i hian chawhnu lamah Tuirihiau tlawhin Thenzawl-a Dilpui a tlawh nghal bawk a, nizan khan Thenzawl-ah hian riak nghalin Vawiin hian Lamchhip khua a Pangang khawina hmun a tlawh tlawhin Hmuifang-ah sawrkar mi pawimawh te a kawm bawk ang.