State Level Coordination Committee in VLDP sawiho

Planning & Programme Implementation Department in khaw thlan bik 6-a Village Level Development Programme kalpui nana an din, State Level Coordination Committee chu nimin khan Planning & Programme Implementation Department Conference Hall, Aizawl-ah an thukhawm.

Hmasawnna hna hrang hrang, a khaw mipuite rawn chunga kalpui (decentralized Planning) enchhin nan he Pilot Project hi Planning & Programme Implementation Department in 2019 khan an duang a, mahse hripui a len tak avangin kum 2 chuang hma a lak theih loh hnuah tunah chuan hripui a kiam tak avangin hmalak tumin he inrawnkhawmna hi neih a ni.

Mizoram District 6-a khaw 6 – Aizawl District-ah Sailam; Champhai District-ah Chawngtlai; Kolasib District-ah Lungdai; Lunglei District-ah Sekhum; Mamit District-ah Ailawng leh Serchhip District-ah Leng khua te chu SIRD&PR in thlangchhuakin Entry Point Activity (EPA) te chu mipui rawn chungin tihfel leh thlan niin Development Plan te duan a ni a. Khaw tin tan cheng nuai 10 dah niin heng hi Entry Point Activity tana hman tura ruahman a ni.

VLDP in a tum ber chu Decentralized Planning enchhin a, hmasawnna hna te chu mipui mamawhna leh duh ang ngei a kalpui bakah eizawnna ngelnghet an neih nana kawng hrang hranga ruahman awmsa te tihphuisui leh tihchak a ni a. Nimin-a thutkhawmah hian khaw tin tana Development Plan siam leh Entry Point Activity thlan te chu sawiho niin heng-a Line Department te mawhphurhna leh an tih tur te sawilan a nih bakah EPA te endik chungchang pawh sawiho a ni a. EPA te hi tun thla tawp lamah tan beisei a ni.