COVID-19 hri kai mi 23 hmuh belh leh an ni

Niminpiah khan Mizoram-ah Sample 405 enfiah leh niin heng atang hian COVID-19 hri kai mi 23 hmuhchhuah an ni a, Sample enfiah atanga chhutin za zela 5.68 te chuan hri an kai a ni.

Niminpiah a COVID-19 hri kai hmuhchhuah te hi Rapid Antigen Test hmanga Sample enfiah 395 atanga hmuh te vek an ni a, Saitual District-ah 8, Lunglei District-ah 7, Aizawl District-ah 5 leh Champhai, Mamit leh Khawzawl District-ah mi pakhat theuh te an ni. Heng bakah hian ZMC-a RT-PCR Laboratory-ah Sample 5 leh TrueNat Laboratory-ah Sample 5 enfiah ni bawkin hri kai hmuhchhuah an awm lo thung a ni.

Nimin khan Mizoram District 6-ah COVID-19 hri kai enkawl dam mi 27 an awm belh ve leh bawk a, heti hian nimin tlai dar 5:00 thleng khan Mizoram-a COVID-19 hri kai hmuhchhuah tawh chu 2,28,205 niin an zinga 2,27,366 te chu enkawl dam ni tawhin hri kai hmuh atanga chhutin za zela 99.63 te chu enkawl dam an ni tawh a, hri kai enkawllai mi 141 la awmin hri kai zingah mi 698 an boral tawh bawk a ni.

Mizoram District 11 zingah District 9-ah hri kai enkawllai an la awm a, Lunglei District-ah hri kai enkawllai 43 la awmin Aizawl District-ah 41 leh Saitual District-ah 38 an la awm a. Serchhip, Khawzawl,  Mamit, Champhai, Hnahthial leh Kolasib District-ah te hri kai mi 10 aia tlem an awm mek bawk a ni.