Mizoram District 9-a Vaimim chinna Hectare 490 chuanga zau ah Fall Army Worm (FAW) a puang

Mizoram District 9-a Vaimim chinna hmun hectare 490 chuanga zau-ah Vaimim eichhetu Pangang, Fall Army Worm chu kumin hian a puang leh tawh a, ruahtui a tlak leh tan tak avangin Vaimim tharchhuak a tlem phah loh an beisei tih Agriculture Director James Lalsiamliana chuan a sawi.

Agriculture Department hotute hnen atanga thudawn danin Fall Army Worm (FAW) Pangang hi Mizoram District 9-a khaw 89-ah Vaimim chingtute’n an buaipui mek a, Vaimim chingtu chhungkaw 2,000 aia tam a timangang mek a. Hmun thenkhatah chuan Vaimim tiak tir a kung leh a hnah a ei chhe nasa hman a, hmun thenkhatah erawh chuan rannung thahna hlo an hman hma avangin Vaimim kungin a tawrh nasat hma a thah rem a ni. Mizoram District 9 zingah hian Lunglei District-ah Vaimim chinna ram hectare 287-ah Pangang hian Vaimim a khawih a, Mamit District-ah Hectare 93.6, Kolasib District-ah Hectare 69.7 leh Aizawl District-ah Hectare 38.4-ah te he Pangang hi hmuh a ni a. Serchhip leh Hnahthial District-ah chuan Pangang hian Vaimim bawm ve bawk mahse, a nasa lova, Khawzawl leh Siaha District atangin report dawn a la ni lo.

Agriculture Department Director James Lalsiamliana chuan Fall Army Worm Pangang in Vaimim chinna hmun a khawihchhiat dan chanchin hi dawn belh zel a nih thu a sawi a, Vaimim chingtute leh Department hotute’n Pangang puangin Vaimim a tihchhiat tam lohna turin tan an la mek a. Ruahtui a tlak tawh bawk avangin Vaimim tharchhuah a tlem phah loh an beisei thu a sawi bawk a ni.

FAW tuar nasa ber Lunglei District-ah hian kuthnathawktu chhungkaw 1,975 hnenah Vaimim chi (Var Suraj-251) tuh tur quintal 395 chu kumin ah semchhuah a ni tawh a. April thla a an tuh heng Vaimim chawrno hi hmun engemaw zatah Fall Army Worm Pangang hian a luhchilh nia thudawn a ni bawk.

Fall Army Worm (FAW) hi kum 2019 atang khan Mizoram-ah hriat tan niin hemi kum atang hian kumtin Mizoram-ah a puang thin a, kum dangah pawh Vaimim tharchhuah titlem lutuk khawp chuan chhiatna a thlen ngai lem lo niin Agriculture Department hotute chuan an sawi a. Tunah phei chuan loneitu ten lo beihlet dan te an hriat tawh avangin hmun thenkhat ah chuan harsatna lutuk a thlen tawh lo nia thudawn a ni.