MPSC kum 30 tlin pualin Lehkhabu tlangzarh

Mizoram Public Service Commission (MPSC)-in kum 30 a tlin puala tihchhuah Coffee Table book ‘A saga of three decades’ tia vuah chu nimin khan Planning Board Vice Chairman H. Rammawi chuan a tlangzarh.

Lehkhabu tlangzarhna puala inkhawm MPSC Mini Examination Hall-a neih ah H.Rammawi chuan MPSC kum 30 tlin champhaphak puala buatsaih, thlalak hlu tak tak leh kum 30 chhunga MPSC sulhnu pawimawh tak tak thailanna lehkhabu tihchhuah a ni chu lawmawm a tih thu sawiin, hun leh kum a liam zel anga, he lehkhabu hlutna hi a pung tial tial dawn a ni, a ti a. MPSC chu Mizoram mipuite rinngam, a hmingchhiat sawi tur awm ngai lo a ni tih sawiin Planning Board Vice Chairman chuan, he an thianghlimna leh hmingthatna vawn nun zel hi Chairman leh member te kutah chauh a awm lova, Officer leh Staff mimal tin ten rinawm taka thawh chu an mawhphurhna a ni, a ti a. Pathian rawngbawlna rilru pu chungin mahni mawhphurhna zawn theuhah rinawm taka thawk chhunzawm zel turin a chah a ni.

MPSC Secretary Er. Lalhriatpuia kaihhruai he hunah hian MPSC Chairman Lalramthanga Tochhawng pawhin MPSC in kum 30 zinkawng an zawh chhungin hmingtha taka Vawiin a thleng thei chu lawmawm a tih thu sawiin, State dang PSC-a thleng thin chanchin duhawm lo an nei ve ngai lo chu a lawmawm takzet a ni, a ti. Pearl Jubilee ropui taka lawm an tum hripui leng vangin sukuk mah se, remhre taka kumkhaw rotling tur Coffee Table Book an buatsaih chu a lawmawm a tih thu sawiin, Thlalak hian mit a la a, mite thinglungah thu tam tak a sawi a, thlalak dahkhawmna lehkhabu hmanga MPSC chanchin tha taka vawnthat a ni chu lawmawm a tih thu a sawi bawk.

MPSC hi kum 1991 khan din niin kum 2021 khan an din cham-phaphak vawi 30-na an thleng tawh a. Amaherawhchu, hripui leng avangin lawmna hun an buatsaih thei lova, an Pearl Jubilee pual hian Coffee Table Book hi an buatsaih ta zawk a ni. He lehkhabu chhungah hian MPSC Chairman leh Member lo ni tawh te thlalak, kum 30 a tlin kuma Chairman leh Member te chanchin te, recruitment an lo neih tawh te leh thil pawimawh dang engemawzat tarlan a ni a. A din tirh atangin MPSC hian hnathawktu lak hrang hrang buaipui tawhin tun thlengin Direct Recruitment post 4000 zet an kalpui tawh a, DPC vawi 7000 chuang an thu tawh bawk a ni.

MPSC-ah hian Lalramthanga Tochhawng chu Chairman ni mekin Member pahnih - Er. Vanlaltlana leh Vanlalngaihsaka te an awm mek a. Gazetted Officer 10 leh Provisional Employees leh Muster Roll Workers tiamin Staff dang 56 an thawk mek a ni.

Comments

Popular posts from this blog

Volleyball S/F khel dawn