Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

Pasal kut tuar nia hriat Rosangzuali thih dan chhui zuiin Lungleng-ah a ruang vuiliam a ni

Pathianni-a boral Serchhip Dinthar Veng-a Rosangzuali chu a pasal, PC. Zobiaksanga chuan kut a thlak ngei tih a sawi a, Rosangzuali ruang hi nimin tlai khan an khua, Lungleng-ah vuiliam a ni.


Pathianni-a kut tuara boral ni ngeia hriat Rosangzuali thih dan chungchang hi Serchhip Police te chuan chhui zui zelin he thihna thleng chungchanga thu zawhfiah tura lak Rosangzuali pasal, PC. Zobiaksanga chuan Serchhip Police te hnenah a nupui hi kut a thlak ngei thu a sawi nia thudawn a ni a. Thudawn danin Rosangzuali hian inkhawm tura a kal hmain thawmhnaw thenkhat chu suk tura dahin hei hi inkhawm ban-ah a pasal hian a lo suk loh avangin an inhnial a, heta an inhnialna ah hian Zobiaksanga thin thawk thutin Choka-a thingzai bung chu la in mutna pindan lama awm chu a vua niin a sawi a, vawi hnih a vua nia thudawn a ni bawk.

Hetianga kut a thlak hnu hian thichhawng a awm zuiin Zobiaksanga mangang hian a bawihsawm zui nia thudawn a ni bawk a, amaherawh chu chhan theihloh in a boral zui a, hemi hnu hian an In chung-a a nau kum 22 mi chu ko in hemi hnu hian midang te pawhin an lo hre darh zui ta tih kan thudawnna chuan a sawi bawk.

He thil thleng kaihhnawih ah hian Serchhip Police Station-ah tualthah thubuai ziahluh nghal a ni a, pawikhawihtu a puh hi 302 IPC R/w 6(2) of MLP Act, 2019 hmanga thubuai siam sak a ni tih Serchhip Police te chuan LENKAWL an hrilh bawk a. He vanduaina tawktu Rosangzuali chhungte lam pawh hian he thil thleng chungchangah hian FIR thehluh ve an tum nia thudawn a ni bawk.

He pawikhawihna thlenga nunna chan ta Rosangzuali ruang la tur hian nizan hmasa khan Lungleng khawtlang chu Serchhip-ah an rawn kal a, khawtlang hruaitu ve ve te inkawmna an neih hnuah nizan hmasa dar 1:00 vel khan a ruang hi Lungleng panpui niin nimin chawhma lam khan Aizawl Civil Hospital-ah a ruang hi Postmortem a ni a. Hemi hnu hian Lungleng lamah a ruang hi lak leh niin nimin tlai dar 3:00 khan vuiliam nghal a ni.

Serchhip Sub-Hqrs. MHIP chuan nimin khan an Office-ah an President Lianthangi hova thutkhawm neiin he thil thleng an dem thu leh pawi an tih thu an sawi a, thutkhawm neih hnua thuchhuah an siamah MHIP Sub-Hqrs. Serchhip chuan Hmeichhia te chunga hleihlenna leh tharum thawhna an dodal tlat laia Rosangzuali chunga thihna khawp hiala tharum thawhna lo thleng hi an hmeichhiat pui te chungah thleng nawn leh tawh lo se an duh takzet tih sawiin, “He thihna rapthlak leh tihbaiawm tak chunga mawhphurtu, Pu Zobiaksanga hi a na thei ang bera hremna pe turin thuneitute kan phut tlat a ni,” an ti bawk. MHIP Sub-Hqrs. Serchhip chuan Rosangzuali kalsan tak a fanu, thla ruk mi vel mamawh phuhrukna atan eitur pek pawh an rel nghal a ni.

Comments

Popular News (Last 30 Days)