COVID-19 hri kai leh enkawl dam awm belh zel

Mizoram-ah COVID-19 hri kai hmuhchhuah belh awm zelin enkawl dam pawh an awm ve zel a, nimin tlai thleng khan hri kai enkawllai mi 134 an awm mek.

Niminpiah khan Mizoram-ah Sample 257 enfiah leh niin heng atang hian COVID-19 hri kai mi 34 te hi hmuh an ni a, an zinga mi 32 te chu Rapid Antigen Test hmanga Sample enfiah 214 atanga hri kai hmuhchhuah niin Saitual District-ah 10, Aizawl District-ah 9, Lunglei leh Serchhip District-ah mi 4 ve ve, Hnahthial District-ah mi 3 leh Mamit District-ah hri kai mi pahnih hmuh an ni.

Heng bakah hian Fluorescent Immunoassay (FIA) Test hmangin Aizawl-ah Sample 28 enfiah niin hri kai mi 2 hmuh an ni bawk a, ZMC-a RT-PCR Laboratory-a Sample enfiah 3 leh Lunglei District-a TrueNat Laboratory-a Sample enfiah 12-ah hri kai hmuhchhuah an awm lo thung.

Hetihlai hian nimin khan Mizoram-ah hri kai enkawl dam mi 65 an awm belh ve leh thung a, heti hian nimin tlai thleng khan Mizoram-a hri kai hmuhchhuah tawh chu 2,28,094 niin an zinga 2,27,262 te chu enkawl dam an ni tawh a, hri kai hmuhchhuah atanga chhutin za zela 99.64 te enkawl dam ni tawhin hri kai enkawllai mi 134 an la awm a ni. Nimin khan Mizoram-ah hri kai boral mi pakhat awm belh lehin tun thla ni 2 hnua hri kai boral awm leh hmasa ber a ni a, Mizoram-ah COVID-19 hri kai mi 698 an boral ta a ni.