Union Minister of State for Railways and Textiles in Chawilung-a Mulberry leh Eri chingtute a kawm

Mizoram-a rawn zin mek Union Minister of State for Railways and Textiles Darshana Jardosh-i chuan nimin khan Chawilung-ah Mulberry leh Eri chingtute a kawm.

Chawilung khuaa heng mite a kawmna ah hian Union Minister of State Darshana Jardosh chuan Mizoram chu nuam a tih thu sawiin, Chawilung khua sikul naupang leh khawtlang chungah a bikin lawmthu a sawi a. India sawrkar chuan hmeichhia te dinhmun tihhmasawn nan nasa taka tanlak a tum a, puantah lama hmasawn nan hmeichhia ten mawhphurhna pawimawh tak kan nei tih sawiin, hmeichhia te hi chhungkaw enkawltu an nih theih bakah eizawngtu an ni thei a ni tih hre turin a chah a. Union Minister of State chuan Chawilung-a Silk Pangang khawi chu khawvelin a ngaihsan Silk a ni tih hriain, Silk hmangin khawvel tukverh an chuangchhuak thei a ni tih inhre turin a chah a. Silk Industry tihhmasawn nan Ministry of Textiles chuan cheng nuai 700 chuang Mizoram sawrkar pe turin ruahmanna a siam a, Chawilung khua hi Sericulture Village a nih theihnan Mizoram Sericulture Secretary hriatpuina in hmalak a ni dawn tih a tarlang bawk a. Intodelh India Scheme chu Chawilung khua hian a chhim phak dawn a, mitin hamthatna thlen chu India ram sawrkar tum a ni tih a sawi bawk a ni.

Chawilung khua ah hian an khaw VCP R. Zoliana leh Sericulture Department hotuten Union Minister hi an lo dawngsawng a, Minister hi Mulberry leh Eri chingtute huanah kalin, a hmunah a enpui a. Chawilung-ah hian Mulberry leh Eri chingtu intelkhawm chhungkaw 25 an awm a, chhungkaw khat hian Tin khat hmun vel ching theuh ang an ni.

Chawilung khua hian an khua hmasawnnan an mamawh hrang hrang- Sericulture Link Road, Solar pump, Solar light, Health Sub-Centre, Hmuifang leh Baktawng inkar kawng National Highway a puan te, School Class 10 thleng zirna an neih theih nana hmalakpui turte in Minister hnenah hian an lo thlen a ni.

Hemi hnu hian Hmuifang tlawhin Commerce & Industry Department hotute leh Central Silk Board hotute nen inkawmna an nei a, hemi hnu hian Zemabawk-a Sericulture Training Institute chu tlawh lehin Silk Showroom pawh a tlawh nghal a, Luangmual-a Apparel & Garment Making Unit a tlawh bawk. Ruahman lawk ang chuan Vawiin hian Mizoram-a Rel kawng siam mek chungchangah Chief Minister te nen thutkhawm an nei leh dawn bawk a ni.

Comments

Popular posts from this blog

Volleyball S/F khel dawn