Buhfai leh LPG-ah harsatna awm loh beiseiin Oil pawh a rawn thlen zel beisei a ni

Food Civil Supplies & Consumer Affairs (FCS&CA) Director, Ramdinliani chuan Petrol leh Diesel (POL) ah mipuite tan chi-aina em em tur a awm lo tih sawiin, Guwahati a mi by-road a phurh tur a nih vangin a rawn thleng muang deuh rih mai dawn tih a sawi a, buhfai dinhmun a tha tih a sawi bawk.

Tunhnaia ruahsur nasa avanga Rel hmanga Mizoram mamawh phurhluhna kawnga harsatna awm chungchangah Food Civil Supplies & Consumer Affairs (FCS&CA) Director Ramdinliani chuan Mizoram in tuialhthei a mamawh te chu Lumding leh Badarpur kaltlangin Rel a rawn phurh thin a ni tih sawiin, chung te chu Ramnagar Oil Depot, Silchar-ah a lo thleng khawm thin a. Lumding leh Badarpur inkara leimin in Assam leh Mizoram (Barak Valley chhim lam zawng) mamawh (oil) lakluhnaRrel kawng a tihchhiat chu siamthat theih a nih hun tur hriatthiam a har tih sawiin, Railway lam chuan thla khat chhung vel a siamthat (restore) theih an inbeisei tih a sawi a. Tun dinhmun ah Ramnagar Oil Depot-ah Diesel chhekkhawl sa a tam thu leh Petrol erawh a tam lo tih sawiin, Diesel leh Petrol te chu Barak Valley chhimlam zawng (Mizoram telin) te chan tur chu Guwahati atangin by-road a lakluh tur a nih thu leh lakluh mek a nih thu a sawi a ni.

Mizoram-a Oil phurhluh chungchang ah Indian Oil Corporation Limited (IOCL) hnuaiah transporter thahnemtak an awm tih Supply Department Director chuan sawiin, IOCL leh Railway lam pawh an biak reng thu a sawi a, “A rawn thleng reng dawn a, kan lakna a hla ta deuh a, chu mai chu a ni. Chi-aina em em tur a awm lo, a rawn thleng reng dawn a, mahse a rawn thleng fan deuh dawn a ni mai, Oil kan lakna a hla ta deuh a, chu mai chu a ni. Duhthaw thil thu a intlar vak vak a ngai hranpa lo, chi-ai vak tur a ni lo, a rawn thleng reng dawn,” a ti bawk.

Supply Department Director sawi danin, Lumding leh Badarpur inkara harsatna thleng vangin IOCL lam chuan LPG lamah harsatna a thlen an ring lo a, Agartala-a Bottling Plant chuan Tripura leh Mizoram mamawh a chawm zo in an hria a. Buhfai lamah pawh Mizoram dinhmun a tha tih sawiin, chhekkhawl sa a tam tawk tih a sawi bawk.