Serchhip Venglai-a Mizo Hnam Run sak thar MNF President Zoramthanga’n a hawng

Serchhip khawpui chhunga Political Party Office nghet hmasa ber, Serchhip East Block MNF in Serchhip Venglai-a an sak 'Mizo Hnam Run' chu nimin khan MNF President Zoramthanga chuan a hawng.

Serchhip-a Mizo Hnam Run hawn tak hi kum 2002 khan cheng nuai 5 senga mimal ram leiin hmalak tan a ni a, June 29, 2019 khan a sak hna hi thawk tanin Building hi RCC hmangin a dung ft. 36 leh a vang ft. 17-a zau in sak a ni a, tunah hian chhawng thum awm tura ruahman phawt niin kawng an hnuailam chu la sak phui loh ala ni a, kawngpui an chu Hall atana ruahman a nih bakah kawngpui chunglam hi Office tura ruahman niin heng te hi luah theih tura peihfel a ni tawh a, he building sakna atan hian cheng nuai 13 vel sen a ni tawh bawk.

Serchhip-a Mizo Hnam Run hawnna hun hi Serchhip East Block MNF President C. Vanlalsiamthara chuan kaihruaiin MNF President Zoramthanga chuan MNF Party chu dinna ngai a ding tlat anih avangin kum 60 chuang harsatna hrang hrang karah Pathian in a hruai tlat tih a sawi a, “MNF Party chu kalphung nget nei, ‘Pathian leh kan ram tan’ ti tlat tu kan ni,” a ti a, Mizoram in hun harsa tak tak a tawh laia ram enkawl turin Pathian in a ruat thin an nih thu sawiin, “Mautam, Hrilen kum te, Assam nena Border buai bakah Myanmar rambuai avanga Refugee an lo luh kum-ah te hian kan duh vang reng nilo in Pathian in MNF Party chu Mizoram kaihruai turin a dah thin a ni,” a ti. A sawi zelna ah MNF President Zoramthanga chuan hun harsa tak tak kan tawh changin kawng thenkhat ah tihfuh nei thin mah ila kawng tam takah pawh tihfuh loh a awm ve bawk tih a sawi a, “Kohhran leh Khawtlang te nan tangrual in hrileng boruak pawh hi kan sutlang dawn a ni,” a ti bawk. He hunah hian MNF President hian an Party zawm thar mi 45 te chu a lawmlut nghal bawk a ni.

Serchhip-a Mizo Hnam Run hawnna hunah hian Serchhip East Block MNF-a NCM LP. Lalsanglura chuan Technical Report pe in Lunglei Sub-Hqrs. MNF atangin K. Vanlalvena chuan thu a sawi bawk a, he hunah hian an Party member thahnem tak an tel a ni.

MNF President Zoramthanga hian nimin chawhnu lam khan Thenzawl pan leh nghalin Thenzawl Joint YMA Hall-a MNF Serchhip West Block Conference chu a hmanpui nghal a, “Pathian in Thenzawl leh a chhehvel hmun rem leh tha takah a dah che u a. Hetianga hmun rem leh pawimawh a hmala tur hian Serchhip bial-ah MNF MLA nei ngei tawh turin Party mipuiten tan kan lak a ngai,” tiin an Party zawm thar mi 208 a lawmlut nghal bawk a ni.