BRO hnathawh tha mi 4 Governor in a chawimawi

Ramri hrula Project Pushpak in kawng siam hna thawh meka hnathawh enkawltu Border Roads Organisation (BRO) hnathawk mi pali te chu nimin khan Mizoram Governor Hari Babu Kambhampati chuan chawimawina a hlan.

Nimin-a Governor in chawimawina a hlan te hi Rajesh Kumar Singh Parihar, HQ 24 BRTF(P) Pushpak; Rajendra Nath Bindhani, 158 FCPL/71 RCC (GREF); Nitin Kumar, 401 RMPL/71 RCC (GREF) leh NR Arvind Kumar Tiwari, 1604 PNR COY (GREF) te niin heng mi te hi Project Site hrang hrangah hnathawktu enkawltute an ni a, an hna tha taka thawkin entawntlak takin an tihtur te an puitlin a. An hnathawh that avang hian Governor Hari Babu Kambhampati hnen atangin chawimawina thuziak leh Memento an dawng a ni.

Governor chuan heng BRO hnathawk tha te chu a lawmpui thu sawiin, tuna Project Pushpak in an hnathawh mek - kawngpui siam hna chu Mizoram tana rotling, India ram tana hmasawnna ruhrel pawimawh leh ramri venhimna atana thil pawimawh a ni tih a sawi a. Chuvangin uluk takin Project Pushpak chuan an thawh chhunzawm zel pawh a ngai a ni, a ti a. Ramri hrula kawng siam hna hi bungrua leh chakkhai phurh thlen a harsat avangin hna thawk tha turin inpekna thuk tak nena thawh a ngai tih sawiin, chawimawina dawngtute pawh hian chawimawi an phuin an lawmpuiawm hle tih a sawi a. “Ramri hrul leh hmun kilkhawr ah BRO ten hna tha takin an thawk thei a. Hei hi Mizorama hmasawnna ruhrel thawktute dang - Contractor te leh Department anga thawktute pawhin entawn se, hna tha taka thawk a, State tana rotling tur siam se a tha hle ang” a ti bawk.

He hun hman zawh a nih hnu hian Governor chuan Pushpak hotute chu an hnathawh mek chungchang te a zawt a, Project Pushpak-a CE, PN. Yadav chuan Project Pushpak hnuaia hmalak mek te leh an thlen chin te a sawi a. Mizoram chhim tawp lam leh chhim chhak lama ramri hrul ah te chak takin hma an la mek a, thla reilote chhungin a tam zawk chu an thawh zawh hman a beisei tih a sawi bawk.