Mizoram mamawh hrang hrang lakluh kawnga harsatna awm thei Supply Minister hovin sawiho a ni

Tunhnaia ruahsur nasa leh hemi kaihhnawih avanga Mizoram mamawh chawkluhna kawnga harsatna awm chu nimin khan Supply Minister K. Lalrinliana hovin sawrkar mi pawimawh ten an sawiho a, Rel kawng chhia chu siamthat chhung a rei dawn thu leh Motor kawng erawh reilote a siamthat hna zawhfel beisei a nih thu tarlan a ni.

He sawihona Supply Minister Pisa-a neih ah hian FCS& CA Deparment official te bakah Food Corporation of India (FCI) leh Indian Oil Corporation Ltd. (IOCL) hotute telin, tunlai ruahsur nasa in Rel kawng leh motor kawng a tihchhiat avanga ration buhfai, POL (Petroleum, Oils and Lubricants) leh chakkhai pawimawh dang Mizorama lakluh a tih khaihlak dan leh mipuiin an tawrh lutuk lohna tura hmalak dan tur an sawiho a, he hunah hian ruahsur in Rel kawng a tihchhiat nasat avangin siamthat chhung a rei dawn tih thu tarlan a ni a, Motor kawng erawh reilote a siam that zawhfel beisei a nih thu tarlan a ni a. Rel kawng hi a rang thei ang bera siamthat a nih theih nan Supply Minister chuan Union Railway Minister hnenah thlenin a siamthatu turte tun aia tam zawk dah turin a ngen a, heng bakah hian External Affairs Minister hnenah Bangladesh kaltlanga POL leh Gas (LPG) lakluh a nih theihnan a rang lama hma laksak tur in a thlen bawk a ni.

Supply Department leh FCI te buhfai chhekkhawl report enhona atanga a lan danin, mipui hnena Ration buhfai pekchhuah kawngah harsatna a awm rih dawn lo tih sawi chian a ni a, FCI pawhin Rel kawng siamthat a nih hma chu lirtheiin Mizoram-ah an rawn phurlut dawn tih an sawi bawk.

IOCL lam atang POL report ngaihthlak niin, IOCL lam chuan HSD (Diesel) chu Ramnagar Oil Depot-ah a tam thu an sawi a, Mizoram-a lakluh kawngah harsatna a awm loh thu an sawi bawk a. MS (Petrol) hi Ramnagar Oil Depot-ah a tlem avangin Guwahati atanga la turin Oil Tanker 30 Silchar-ah an awm tawh thu an sawi bawk. Borkhola Gas Bottling Plant atanga thu dawn danin Gas (LPG) Supply-ah harsatna an neih rih loh thu hriat a ni bawk.