Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

PM Cares for Children Scheme kaltlangin Serchhip District-ah mi 4 te hamthatna pek an ni


PM Cares for Children Scheme hmalakna thilah nimin khan rampum-a District thuneitute chuan Prime Minister hovin Virtual Meeting an nei a, he hunah hian PM Cares for Children Scheme, 2021 tanpuina dawng tura thlan te hnenah tanpuina semchhuah niin Serchhip District atangin mi 4 in an dawng a ni.


PM Cares for Children Scheme hi nikum May ni 29 khan Prime Minister Narendra Modi chuan a lo hawng tawh a, he Scheme in a tum ber chu naupang, COVID-19 hripui vanga an nu leh pa chan te emaw, anmahni enkawltu/chawmtu ber chantute baihvai zui mai lova an puitlin thlenga a tul ang zela enkawlna leh tanpuina an dawn a ni a. Naupang, COVID-19 hripui avanga enkawltu nu leh pa nei lova baihvai mai turte chu an damkhawchhuah ngeina tura an mamawh chi hrang hrang, zirna te, Health Insurance te leh thil tul dang awm thei apiangte kum 23 an tlin thlenga enkawl zuina PM Cares for Children hnuaiah hian ruahman niin rampum ah kalpui a ni.

Prime Minister Narendra Modi hova Video Conference hmanga PM Cares for Children Scheme puala hun hman hi Serchhip-ah chuan Addl. DC Lalmuansanga Ralte hovin Serchhip DC Meeting Room atangin lo zawm ve a ni a, he hunah hian he ruahmanna hnuaia hamthatna dawng turte bakah Serchhip DC Office-a Officer te leh Serchhip District JJB-a Principal Magistrate bakah Child Welfare Committee (CWC) aiawh leh District Child Protection Officer te an tel a, he hun hi Serchhip SDO (Sadar) Lalzikpuii chuan kaihruaiin New Delhi atanga Prime Minister in he hmalakna chungchang thu a sawi chu ngaihthlak a ni a. Hemi hnu hian PM Cares for Children Scheme hnuaia Serchhip District atanga hamthatna dawng tura thlan mi pali (4) te hnenah Addl. DC Lalmuansanga Ralte chuan PM-Cares tanpuina Post Office Passbook leh PM-Cares Certificate hi Prime Minister aiawhin a hlan a. Serchhip District atanga hamthatna dawngtute hi Keitum khua atangin mi pahnih leh Chingchhip Mualpui leh Khumtung khua a mi ta an ni a. He hunah hian naupangte hian Prime Minister lehkhathawn te, PM Cares Certificate te, PM Cares Passbook te leh PM-JAY Health Card te leh PM Cares for Children Document pawimawh dangte an dawng nghal a ni.

PM Cares for Children Scheme hnuaiah hian COVID-19 hri leng avanga nu leh pa chan naupang te tan kum 18 an tlin huna cheng nuai 10-a mature turin account hawn sakin pawisa an dahsak a. Kum 18 an tlin atangin cheng nuai 10 atanga a pung (interest) chu thla tin an la thei dawn a, kum 23 an tlinin cheng nuai 10 hi a hlawm in an la chhuak theih bawk ang. He cheng nuai 10 bakah hian fahrah naupang te lehkha zirna tur leh awmna tur te, Uniform leh zirlaibu leh note book te thlengin ngaihtuah sak an ni anga. Tanpuina sumfai Rs. 4000/- chu thla tin Ministry of Woman & Child Development kaltlangin an dawng dawn a. Ministry of Social Justice & empowerment atangin Class I to Class 12 an zir chhung zawngin Scholarship kumtin Rs. 20,000 an dawng thei bawk ang. Hei mai bakah hian Zirna sang zawk an zir hunah Technical Line-a zirte tan Swanath Scholarship kumtin Rs. 50,000/- an dawng thei bawk anga. PM Cares for Children Scheme,2021 atanga interest rulh sak turin Education Loan pawh an dil theih ang.

Heng bakah hian Ayushman Bharat Pradhan Mantri Jan Arogya Yojana (PM-JAY Card) an dawng a. He Card hmang hian Empenelled Hospital-ah kum khat atan cheng nuai 5 zelin kum 23 an tlin thlengin an bill thei bawk dawn a ni.

PM-Cares Scheme-ah hian ramchhung State 33-a District 611 atangin tanpuina dawng tura dilna 9042 a lut tawh a, an zinga 4345 te chu a dawng thei tura pawm ni tawhin Mi-zoram-ah chuan mi 14 in an dawng a ni.

Comments

Popular News (Last 30 Days)