Covid vei thi zaa 80 vel natna benvawn nei an ni

Health Minister Dr. R. Lalthangliana chuan Mizoram-a Covid vei thi zinga zaa 80 vel chu natna benvawn nei an ni tih sawiin, Covid thihpui tak chu zaa 20 vel an nih thu a sawi.

MNF Party in nimin-a Aizawl Mizo Hnam Run-a Chhung Inkhawm an neih ah MNF Adviser ni bawk Dr. R. Lalthangliana chuan thu sawiin, tunah hian Mizoram-a COVID vanga thi chu mi 700 la tling lo deuh a ni tih sawiin, “Covid vei atanga thi 698 vel hi chhutin India ramah kan thi tlem ber a. Thi zinga 80% chu natna benvawn nei, Cancer, BP sang, Lung na leh natna serious tak tak lo vei sa te an ni a. Covid thihpui tak hi chu a thi zinga 20% vel hi a ni ang,” a ti a. State dangten Covid chungchanga Mizoram sawrkar hmalakna an hrilh thin dan pawh sawiin, “Mizoram chuan in ulukin test ngai zawng zawng chhui chhuakin in test a, sawrkar, Kohhran, Tlawmngai pawl hrang hrangte inthawhhona a tha a, India ram leh khawvel hmun dangah Mizoram anga hmala tha in awm ve lo min ti,” a ti bawk.

Health Department changtu Minister Dr. R. Lalthangliana chuan Covid in kum 2 vel min tihbuai thu sawiin, “Health Department-ah hian sawrkar hmasa khan hna lak a lo nei mumal si lo a, Health bikah post ruak 3000 dawn kan nei mek a ni. Kan Chief Minister hovin ngaihtuahna kan seng a, 2019-a kan sawrkar tirh khan post ruak 734 la turin cheng vbc. 50 kan dah fel a, Finance pawhin min approved fel tawh kha Covid lo awm leh thut avang khan kan la thei ta lo a ni,” a ti a, “Loh theih loh avanga Health bika hnaruak hnawhkhah tur hi tunhnai mai khan kan CM hovin, Finance, Planning, DP&AR hotute nen kan rel a. Mahse, tuna dil mai chi a la ni rih lo a, a tlem berah pawh thla 3/4 lai a fel hun tur la nghah ngai a ni,” a ti bawk.

Health Minister chuan sawrkar hmalakna te tarlangin, Aizawl Civil Hospital-ah ICU khum 5 chauh awm thin chu khum 10 kan neih tak thu leh a dang 10 ruahman leh mekin Nausen ICU engemaw zat an siam leh mek bawk tih a sawi a. Civil Hospital-ah Cardiology (Lung lam) enkawlna turin cheng vbc. 12 an ruahman mek thu te, District zawng zawngah Oxygen khawlpui an din fel tawh thu leh ZMC-ah a tira khum 140 awm kha an sawrkarah chuan 400 vel neiin ICU 13 chauh awm chu 80-ah an tihpun thu te a sawi a. Hei bakah hian International-ah leh India ramah pawh zahpuiawm loh tur, North East-ah pawh a tha ber tura ngaih kum 2019 atanga Japan (JICA) nen indawrin Cancer Super Speciality Hospital lian din tura ka hmalakna pawh Delhi lam dawr ngai tawh lovin a lehkha kal kual tur a fel vek tawh tih a sawi a, a tira cheng vbc. 500 ruahman in a daih loh dawn avangin cheng vbc. 660-a din tura tihfel a nih thu leh a project hi a len tham avangin kum 2028-ah daih thawh zawh a nih tur thu a sawi bawk.

Comments

Popular posts from this blog

Bialtu MLA in Laptop pe