Khum 100 awmna tur Serchhip District Hospital sakna tur sum atan MoU ziahfel a ni ta

Khum 100 awm theihna tur Serchhip District Hospital sakna tur atan Mizoram sawrkar-a Health & Family Welfare Department, Power Grid Corporation of India Limited leh Serchhip District Deputy Commissioner te chuan nimin khan thawhhona thuthlung, Memorandum of Understanding (MoU) chu an ziak fel ta.


Memorandum of Understanding (MoU) ziahna hun CM Conference Hall-a neih ah hian Chief Minister Zoramthanga chuan District Hospital thar nei tura MoU ziah a ni chu lawmawm a tih thu sawiin, Mizoram-ah hriselna kawnga inenkawlna Health Facility tha leh changtlung zawk kan siam zel a pawimawh thu a sawi a. Health & Family Welfare Minister Dr. R. Lalthangliana pawhin a hma thei ang bera Hospital sak hna chu thawh a nih ngei a beisei thu a sawi bawk.

Khum 100 awm theihna tur Serchhip District Hospital hi Power Grid Corporation of India Limited chuan an Corporate Social Responsibility Fund atangin cheng nuai 2100 in an sak tura ruahman a ni a. Thuneitute hnen atanga sanction an hmuh atanga thla 24 (kum hnih) chhunga sak zawh tura ruahman a ni. District Hospital Building thar hi RCC building tur niin chawng ruk (6) tur a ni a. Medicine, Paediatrics, Gynaecology and Obstetrics, Orthopaedics, Ophthalmology, ENT, Dental leh General Surgery te awm tura duan a ni a. Department of Health & Family Welfare chu Implementing Authority a ni ang a, enzui hna (Supervision and Monitoring works) chu Deputy Commissioner, Serchhip District kuta dah a ni ang.

Nimin-a MoU ziahna inkhawm hi Chief Secretary Dr. Renu Sharma chuan kaihruaiin, Serchhip DC Nazuk Kumar-i chuan he project chungchang sawifiahna a nei a. Health & Family Welfare Board Vice Chairman Dr. ZR Thiamsanga chuan lawmthu sawiin hun a khar a ni.

Khum 100 awm theihna tur Serchhip District Hospital sa tur hian hun engemaw chen atangin ruahmanna kalpui a lo ni tawh a, harsatna hrang hrang a awm hnuah tunah chuan hmalakna a hlawhtling thei dawn ta niin a lang a. Serchhip DC hova RKS Governing Body thukhawm in rawtna thlen tura a tih anga Serchhip-a tlawmngai pawl hrang hrang leh VC ten damdawi In sakna tur atana an rawt, Bukpui ram chu kumin April 7 khan P&E Minister R. Lalzirliana chuan tlawhin helai hmun hi District Hospital sakna atan pek a nih dawn thu leh dan anga hmalak a nih chhungin Health Department in kut an thlak pawh a rem thu lo sawi tawh a ni.

Comments

Popular posts from this blog

Volleyball S/F khel dawn