Mizoram-ah Micro, Small and Medium Enterprises (MSME) Dedicated Bank Branch thar hawn a ni

Mizoram Rural Bank (MRB) Branch100-na tur MRB Electric Veng Branch chu nimin khan Governor Hari Babu Kambhampati chuan a hawng a, he Branch hi India rama a hmasa ber pawl ni turin Micro, Small and Medium Enterprises (MSME) Ddedicated Bank Branch a ni dawn a ni.

MRB Electric Veng Branch hawnna hunah hian Governor chuan Mizoram-a Bank darh zau ber, Customer nei tam ber, pawisa dahluh tam lama pahnih leh pawisa puktir tam lama pakhatna ni mek MRB in Branch 100-na atan MSME Dedicated Bank Branch, Aizawl Electric Veng-ah an hawng chu hlawhtlinna chhinchhiah tlak a ni tih sawiin, Mizoram mipuite tan MRB chu malsawmna ni chhunzawm tur leh Bank dawr nuam pawla an sawi ni chhunzawm zel turin duhsakna a hlan a. India ram economy-a sum thawkchhuak tam ber chu sumdawng tenau zawk - Micro, Small and Medium Enterprises (MSME) an ni tih sawiin, Mizoram-ah pawh MSME ten sum an thawkchhuak tam ber tih a sawi a. Heng sumdawng tenau te pual liau liau a MRB Branch thar hawn a ni ta chu hlawhtlinna Mllung chhinchhiah tlak tak a ni, a ti bawk.

Governor chuan Bank hrang hrang hotute a kawm tawh thu sawiin, Mizoram mipui tana an hnathawh dan a zawh uluk thin thu leh an tanlak ngai lai te a sawi thin tih a sawi a. Mizoram mipui nuai 12 chuangah hian chhungkua nuai 3 vel awm anga kan chhut a nih chuan chhungkaw tinah Bank Account pakhat zel a awm niin a ngaih theih a. Hei hian Mizoram chu Financial Inclusion bikah chuan India rama a titha pawl tak a ni tih a ti chiang hle a ni, a ti. Hemi dawtah hian sum leh pai enkawl leh peipunna kawnga inzirtirna (Financial Literacy), Digital Transaction leh Oline kaltlanga insumdawna kawnga hmasawn chu kan tum leh tur a nih thu a sawi bawk.

Nimin a MRB Branch thar hawnna ah hian MRB ChairmanV. Jaya Chandra chuan kum 1983 leh tun inkara MRB-a lo thawk tawh zawng zawng leh thawklai te inpekna avangin tunah chuan MRB chu India Hmarchhak-a RRB tha ber a ni tawh tih a sawi a. Nimin a hawn tak MRB Branch hian kum khat (1) a hman hunah cheng vbc. 100 sumdawnna neih hman a tum dawn tih a sawi bawk. Tunah hian Mizoram pumah Customer Transaction/Service point 330 a awm mek a, kum 2 chhungin Mizoram-a khaw tinah CSP hi neih a MRB chu khawtinah dawr theih a siam a ni dawn tih pawh sawiin. MRB chu India hmarchhak-a Bank zingah District Capital zawng zawng leh Revenue Block zawng zawnga Bank nei awmchhun a ni tih a sawi a, kum reilote ah Branch 12 vel Mizoram-ah hawn belh leh a ni dawn a ti bawk.