Kumin-a Serchhip District Police thubuai ziahluh zingah a zatve aia tam rukruk kaihhnawih a ni

Serchhip District Police te chuan nimin khan Serchhip SP Conference Hall-ah Crime Review Meeting an nei a, kumin ah Serchhip District-ah Police ten thubuai 63 ziaklut tawhin heng zingah hian a zatve aia tam chu rukruk leh a kaihhnawih thubuai a nih thu tarlan a ni.


Serchhip District Executive Force (DEF) ten nimin-a Crime Review Meeting an neih hi Serchhip SDPO Kaste Romalsawma chuan kaihruaiin he hun hmanpuitu Serchhip Addl. SP Vanlalnghenga chuan Serchhip District-a Police ten thubuai hrang hrang an ziahluh dan mipuite hriat chu a pawimawh thu sawiin, hei hian kan khawtlang nun a tarlang tih a sawi a. Serchhip District min tibuaitu ber chu thilruk kaihhnawih thubuai a ni tih sawiin, kumin January thla atanga thubuai an ziahluh tawh zinga a zatve aia tam chu hemi kaihhnawih a ni tih a sawi a, rukruk tamna chhan ber chu ruihtheih thil vang a nih thu pawh sawiin, hei vang hian Police te pawhin nasa taka tan an lak thu leh Heroin leh ganja pawh tam tak an man thu a sawi a, amaherawh chu an man loh tam tak a awm dawn thu pawh a sawi a. Serchhip Police te chuan Mizoram District hrang hrang nena khaikhinin hna an thawk tha tih pawh sawiin, tha zawka hna thawk zel turin he huna tel Police Officer te chu a chah bawk a ni.

Nimin-a Crime Review Meeting-a tarlan a nih danin Serchhip District-ah hian Police Station pathum (3) leh Out-Post pakhat awmin, kumin January 1 atanga May 26, 2022 thlengin Serchhip District-ah Police ten thubuai chi hrang hrang 63 an ziaklut a, hei hi nikum-a hemi hun chhunga thubuai ziahluh aiin 4 in a tam zawk a. Kumin a thubuai ziahluh tawh 63 zinga 32 te chu rukruk leh a kaihhnawih thubuai niin hei hi thubuai ziahluh tawh zawng zawng zatve aiin a tam a, nikum-a hemi hun chhunga rukruk leh a kaihhnawih thubuai ziahluh aiin 12 laiin a tam tawh zawk bawk a ni. Heng rukruk kaihhnawih thubuai 32 an chhuina atang hian Police te chuan Rs. 1,94,650/- hu an hmu let bawk.


Heng bakah hian kumin chhung hian ND&PS Act hnuaiah thubuai 8 ziahluh ni tawhin hursualna laka naupangte humhimna dan, POCSO Act hnuaiah thubuai 5 ziahluh a ni tawh bawk a, MLP Act hnuaiah thubuai 4 ziahluh ni tawh bawkin mihring in nunna an channa lirthei chet-sualna thleng tum thum lai ziahluh a ni tawh bawk a. Heng bakah hian thihchhan pangngai lo (Unnatural Death) chungchang ah thubuai 8 ziahluh a awm bawk a ni.

Kumin chhung hian Serchhip District Police te hian Heroin No. 4 kg. 1.524 zet man tawhin Ganja gram 33.09 an man tawh a, hei hi tualchhung rate-a chhutin Rs. 37,78,600 hu vel a ni a, heng Heroin No. 4 an man kaihhnawih ah hian Serchip DEF mi 12 lai te chu DGP Cash Reward dawng tura tih an ni bawk.

Nimin-a he hun hmanna ah hian Serchhip District Court-a Asst. Public Prosecutor Avila Laltanpuii chuan Police ten thubuai chi hrang hrang Court-a an thlen chungchang ah pawikhawihtu te an phu tawk hremna pek an nih theihna tura thil hriat tur pawimawh te a zirtir bawk a. He hunah hian Asst. Public Prosecutor chuan tun dinhmun ah Serchhip District Court-ah Police te thubuai neih Pending 31 a awm tih sawiin, kumin chhung hian Police te thubuai neih ah tum khat chauh tih loh chu pawikhawihtu a puh te thiamloh chantir an nih thu a sawi a. Hei hi Police te thawh-rimna vang a ni tih sawiin, District hrang hrang zingah Convicted Rate nei tha ber zinga mi kan nih thu a sawi bawk.

Nimin a Crime Review Meeting-ah hian Police Station hrang hrang ten an hnathawh leh dinhmun a lem nen entirin an tarlang a, an hmalakna a harsatna an neih te leh thubuai chhui kawnga harsatna an neih te pawh thlirin, chak zawka mipuite tana hmalak zel dan tur pawh an sawiho bawk a ni.

Comments

Popular posts from this blog

Volleyball S/F khel dawn