NSS hmalakna leh hmalak zelna tur thlirho a ni

State Level National Service Scheme (NSS) Advisory Committee Meeting vawi 18-na chu nimin khan neih niin kum kaltaa NSS te hmalakna thlirlet a nih bakah kumthar a hmalakna tur hrang hrangte sawiho a ni bawk.

Sports & Youth Services Minister Robert Romawia Royte hova a Pisa-a thutkhawm neih ah hian State NSS Officer-cum-Deputy Secretary, NSS Cell, Mizoram Dr. Zirlianngura chuan kum 2021-2022 chhunga NSS hmalakna report pein COVID-19 hripui leng vanga Class kal mumal a nih loh avang leh lockdown te puan a nih avangin kum dang anga hmalak a harsat thu a sawi a, heti chung hian Voluntary Blood Donation Camp vawi 72 neiin thisen unit 3215 pek a nih thu te, thingtiak 2540 lai an phun thar thu te, Mizoram chhungah mipui vantlang hman turin zun In 25, Public Water Point 11, Public Waiting Shed 9, Vantlang thutthleng 5 an siam thu te leh faina hnatlang beihpui vawi tam tak an neih thu te a sawi a, Sawrkar laipuiin hmalakna tur programme hrang hrang a rawn duan 16 an tihhlawhtlin theih thu bakah  COVID-19 hripui dona kawngah NSS Cell hrang hrangte an thawhchhuah thin thute leh hemi kawnga an hmalakna hrang hrangte a tarlang bawk.

He Meeting-ah hian kum 2022-2023 chhunga NSS Unit hrang hrangte tan Action plan- thisen an pek zat tur, thing a phun tur zat, Awareness Programme chi hrang hrang an siam zat tur leh hmalakna hrang hrang an neih turte sawiho niin remtih a ni a. Kum 2022-2023 chhunga NSS thupui (theme) atan ‘Water Conservation’ chu thlan an ni bawk.

Kum 2022-2023 atangin zirna In 7 – Mizoram Institute of Advanced Studies (IASE) Republic Veng, Aizawl; College of Horticulture, Thenzawl; Ratu Higher Secondary School; Tlungvel Higher Secondary School; Bungtlang Higher Secondary School; Chhiahtlang Higher Secondary School leh Tawipui Higher Secondary School-ah te NSS Unit thar din an remti a, heti hian Mizoram chhunga zirna In 99 (College/University 29, Higher Secondary School/Technical Institution 70) ah NSS Unit 301 (College/University-ah 104, Higher Secondary School/Technical Institution-ah 197) an awm tawh ang a, Volunteers 30,100 (College/University-ah 10,400 leh Higher Secondary School/Technical Institution-ah 19,700) an awm tawh dawn a ni.

National Service Scheme (NSS) hi Mahatma Gandhi piancham vawi 100-na denchhenin September ni 24, 1969 khan India rama University 37-ah volunteers 40,000 thlangin din a ni a. Mizoram-ah chuan kum 1972 khan Pachhunga University-ah din niin a hnu lamah College leh Higher Secondary School hrang hrangah din belh a ni. NSS Unit 1 ah hian volunteers 100 zel awmin Programme Officer 1 in a vil thin a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man