Cabinet Memorandum duanchhin thlirhona nei

Mizoram-a District Rural Development Agency te (DRDA) te District Rural Development Office (DRDO)-a let tura Cabinet Memorandum buatsaih chhin chu nimin khan RD Minister Lalruatkima hovin sawrkar mi pawimawh ten an thlirho.

RD Minister Pisa-a he thlirhona hunah hian Minister Lalruatkima chuan Sawrkar Laipuiin hun rei tak atanga an kalpui tawh, DRDA Scheme chu ram pumah tihtawp anih avangin DRDO neih a tulzia te a sawi a. DRDO dinna tur phalna GAD in an pek tawh thu sawiin, DRDA in hna an thawhte chhunzawm zel anih thei nan District-ah te RD Office chu a awm a ngai, DRDA hi tawp mahse hengte hi DRDO-ah letin la kalpui zel chu tha nia Department in a hriat avangin he ruahmanna hi siam anih thu a sawi a ni.

He sawihona hunah hian Finance, DP&AR leh RD Department hotu pawimawh te telin Cabinet Memorandum buatsaih chhin chu zau taka sawiho a ni a, chung zingah chuan he ruahmanna atana post siamrem ngai zat te, Sawrkar sumbawm a nghawng dan tur te, District a RD Office pawimawhna leh an mawhphurhna te chu zau taka sawiho a ni.