Deputy Speaker in pass lawmna hun hmanpui

Serchhip District chhunga Govt. Baktawng High School chuan HSLC Result 2022 tihchhuah taka an School atanga Exam zawng zawng an pass vek lawmna hun nimin khan neiin he hun hi bialtu MLA leh Assembly Deputy Speaker Er. Lalrinawma chuan a hmanpui a ni.


Nimin a he hun hmanna ah hian Assembly Deputy Speaker chuan Govt. Baktawng High School in result tha tak an neih theih chhan chu zirtirtute leh naupang te inpekna vang a ni tih sawiin, Zirtirtute leh zirlaiten an mawhphurhna theuh an hlen avanga hetiang hun lawmawm hmang thei hi an nih thu a sawi a. Taimakna tel lo chuan hlawhtlinna kawng a awm loh thu sawiin, Taima tak leh inrintawkna nena kan hmaa awmte beih thin a pawimawh hle tih a sawi a. Naupangte chu nu leh pa chawimawi thiam leh an thuawih a pawimawh zia te, rinawmna, taimakna leh tawngtaina te hi mihring nuna hlawhtlinna rahbi pathum a nih thute hrilhin, lo vawng reng turin a chah a. Lehkha an la zir zel dawn a, eng hna emaw thawh hunte pawh an la nei dawn tih sawiin, eng hna pawh thawk se zahpui lo tur leh mahni mihringpuite hlutna hre reng turin zirlai naupangte a chah a ni.

Govt. Baktawng High School in HSLC Result 2022-a zirlai te an pass vek avanga lawmthu sawina hun an neih ah hian Baktawng-a NGO hrang hrang aiawh te leh khawtlang hruaitute telin lawmpuina thu an sawi bawk. HSLC Result tihchhuah takah khan Govt. Baktawng High School atang hian zirlai exam 28 awmin an pass vek a, Distinction-ah mi 3 pass in 1st Division-ah 8, 2nd Division-ah 13 leh 3rd Division-ah 4 te an pass a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man