COVID-19 ziaawm chho zel

Serchhip District-ah COVID-19 dinhmun in ziaawm lam pan ve hret hret zelin khaw pathum ah hri kai enkawllai mi 7 an awm mek. Nimin khan Serchhip District-ah COVID-19 hri kai hmuhchhuah thar an awm lova, hetihlai hian hri kai enkawllai mi pathum te chu anmhni enkawlna hmun atanga chhuahtir an ni ve leh thung a ni. 

Heti hian nimin tlai thlenga khan Ser-chhip District-a COVID-19 hri kai hmuhchhuah tawh chu 13,980 niin an zinga 13,938 te chu enkawl dam an ni tawh a, hri kai tawh atanga chhutin za zela 99.69 te chu enkawl dam an ni tawh a, hri kai enkawllai mi 7 la awmin hri kai zingah mi 35 an boral tawh a ni. Serchhip District-a hri kai enkawllai mi 7 te hi khaw pathum atanga hri kai hmuhchhuah niin hri kai enkawllai tamna ber Thenzawl-ah mi 4 enkawl an la ni a, East Lungdar-ah mi 2 leh Serchhip-ah mi pakhat enkawl an la awm bawk a ni. Serchhip District-a COVID-19 hri kai enkawllai awm te hi In lama inenkawl vek an ni a, COVID-19 hri kai te enkawlna tur CCC leh DCHC ruahman te chu tunah hian a ruak mek a ni.

Serchhip CMO Office a thawktute chuan tunhma lam deuha COVID-19 hri inkaichhawn awlsam lutuk ang kha tunah chuan a awm ta meuh lo nia an hriat thu LENKAWL an hrilh a, hri kai hmuhchhuah chhungkua, an chenpuite ngei pawh sample enfiah nawn an nih hnua hri kai lo an tam tawh thu sawiin, he hri hian ziaawm lam a pan ve hret hret nia an ngaih thu an sawi a. Hri kai enkawllai te hi mahni In lama enkawl vek an nih thu pawh sawiin, hri kai nia in ringhlel leh in test pawh an tlem tawh thu an sawi bawk. 

Hetihlai hian hri kai nia inringhlel zingah Sample test-na hmun pan kher lova mahni a in test mi engemaw zat an awm niin kan thudawnna pakhat chuan sawiin, heta hri kai hmuhchhuah zingah pawh hian mahni In lama inenkawl mai thin te pawh an awm niin kan thudawnna chuan a sawi bawk.

Comments

Popular posts from this blog

Volleyball S/F khel dawn