Mizoram pum huap Wrestling intihsiakna Serchhip-ah neih mek a ni

/

Mizoram Wrestling Association (MWA) buatsaih, 5th Inter-District Wrestling Championship, 2022 leh Mizo Inchai Champion mekte chotu tur zawnna chu nimin khan Serchhip-ah neih tan niin zanin hian zawhfel hman beisei a ni.


 Serchhip Indoor Stadium-a he inelna hawnna hun hi Sport & Youth Services Developement Board Vice Chairman TC. Pachhunga chuan khuallian nia hmanpuiin kum 2 chhung zet hripui leng avanga infiamna lam kalpui theih a nih loh hnuah tunah chuan hun tha a inherchhuah leh tak thu leh Sports Discipline hrang hrangah inelna hun te pawh buatsaih chhoh leh mek a ni tih a sawi a. Sports lama tui em em Chief Minister Zoramthanga leh Sports lama a ngaihna hria Sports Minister Robert Romawia Royte te chuan hripui leng karah pawh Sports Infrastructure dinna kawngah nasa taka hma an lak thu sawiin, hripui leng chuan Sports Infrastructure dinna kawng a dip lem lo tih a sawi a, Sawrkarin Sport a ngaipawimawha, Sports chu zirna kawngah subject dang ang bawkin a pawimawh tawh dawn thu leh Sports chu Industry-ah puan a nih avangin eizawnna kawng pawh zau zawka a inhawn thu a sawi bawk a ni.

Sport & Youth Services Developement Board Vice Chairman chuan Mizoram chhunga Sport Association hrang hrang zingah Mizoram Wrestling Association hi a ding hmasa ber a nih thu leh tunah chuan Mizoram State Sport Council leh Mizoram Olympic Association hnuaiah inziaklut 33 zet a awm tawh thu a sawi a, Wrestling bik chu National Level-ah kan hniam thu sawiin, hei vang hian tanlak a ngaih thu leh Grassroot atanga tanlak a ngaih thu a sawi a, hemi atan hian taksa in fit-in taksa enkawl uluk a pawimawh thu a sawi bawk a ni.

5th Inter-District Wrestling Championship, 2022 leh Mizo Inchai Champion mekte chotu tur zawnna hawnna hun hi Mizoram Wrestling Association President Zohmingthanga chuan kaihruaiin MWA Gen. Secretary C. Lalhmunfela leh Technical Chairman F.Vanlalsiamaa chuan Report an pe a. Inter-District Wrestling Championship-ah hian Mizoram District hrang hrang atangin infiammi mi 93 telin an zinga 50 hi Serchhip District atanga tel an ni a. Mizo Inchai-a Champion lai te cho tur zawnna ah hian Pa te-ah mi 5, Pa laihawl-ah 2 leh Palian-ah mi 3 an tel dawn a, Nu te-ah mi 2, Nu laihawl-ah mi 3 leh Nu lian-ah mi 3 telin Nu laihawl hi siam thar a nih avangin a chak pahnih ten Title an inchuh thei dawn a, Nu lian hi champion lai a tel thei tawh loh avangin a chak pahnih in Title an inchuh dawn bawk a ni.

Comments

Post a Comment

Popular News (Last 30 Days)

A hun pangngai ah Pavalai Intawhkhawmna neih tum a ni

/
Image
April 12-14, 2024 chhunga Mizoram pum huap Kohhran Pavalai Pawl Intawhkhawmna neihna tur East Lungdar tlang-a Pandal sak chu tukin zing-a thli tleh khan a tichhe vek a. Vawiin vek-a Organising Committee thutkhawm hmanhmawh neih chuan a hun pangngai a neih tumin Pathian chakna ringin inbuatsaihna kalpui nise an ti a. Naktuk (April 1, 2024) atangin Pandal chhia senghawi hna leh Pandal sak that hna chu a khawnat-a thawh nghal tum a nih thu East Lungdar Village Council President K. Lalngaizuala chuan LENKAWL a hrilh.
Kimchang zawkin »

LPG man bithliah thar a ni

/
Image
IOCL in Revised Retail Selling Price a tihchhuah angin Mizoram chhunga eirawngbawlna gas man chu bithliah thar leh a ni a, Vairengte tih loh Mizoram hmundang zawngah chuan LPG Domestic Cylinder kg. 14.2 a rit man chu bur khat Rs. 955/- niin kg. 19-a rit Commercial Cylinder chu Rs. 2224.50 leh kg. 19-a rit XtraTeJ chu Rs. 2247/- a ni anga, kg. 10 a rit Composit Cylinder chu Rs. 688.50 a ni bawk ang. Gas man hi Home Delivery kalpuina ah chuan bur khat ah Rs. 70/- aia tam lo belh tur a ni anga, Home Delivery kalpui thei nganglo Veng, Point delivery kalpuinaah chuan Rs. 7.53 zel belh tur a ni a. Godown-a hralh erawh chuan Rs.33.43 zel paih thung tur a ni.
Kimchang zawkin »