PAMRA hruaitu ten Chief Minister an kawm

Mizoram-a Peace Accord MNF Returnee Association (PAMRA) hruaitute chuan nimin khan Chief Minister Zoramthanga chu kawmin an harsatna te an thlen.

PAMRA General Hqrs. hruaitute leh District tin aiawh PAMRA hruaitute hian nimin khan Chief Minister Zoramthanga hi a Office-ah kawmin kum 1986-a Memorandum of Settlement (MOS) neih a nih thlenga Mizoram leh Hnam tana Zalenna sualtu, Peace Accord MNF Returnees te dikna chanvo leh hamthatna tur Accord-a ziahlan ni si, kum 35 a liam hnu thleng pawha tih hlawhtlin la nilo hrang hrang leh mamawh te Chief Minister hnenah hian an thlen a, heng bakah hian zawhna hrang hrangte an zawt nghal bawk a ni.

PAMRA chuan nimin khan thuchhuah siamin Housing Assistance chungchangah Mizoram Sawrkarin ruahmanna a lo siam sak tawh bakah Chief Minister in ‘Kan pe ngei ang che u’ ti-a a lo tiam tawh chu a hlawhtlin hma chuan an bawhzui zel dawn tih an sawi a. Chaltlang ram, Maumual House Site Plan chu PAMRA hmalakna avangin Mizoram Chief Minister chuan tunah hian hma a la tan mek tih tarlangin, “Kum tam tak hlamchhiaha lo awm tawh hi chenna tlaka chei anih hma chuan hma kan la zel ang,” an ti. Hei bakah hian kum 1986-a inremna neih a nih avang MNF Returnees’ te Remna Run Tlang Luangmual-a Remna Run lawi Ni hriatrengna Lungphun leh Peace Accord MNF Returnees te hming ziahna Lungphun sum tamtak senga PAMRA ten an buatsaih chu Mizoram leh Hnam, thangthar zel te tan pawha History pawimawh leh Accord Symbol a nih avangin an hlut hle tih an sawi bawk.