Raltlan sing thum vel ID Card pek an ni tawh

Myanmar mi Mizoram-a rawn raltlan mi sing thum velte chu chhinchhiaha Identity Card siam sak an nih hnuah ID Card pekchhuah an ni tawh.

Task Group on Myanmar Refugees hotute sawi danin Mizoram-a awm mek Myanmar raltlan 32,000 bawr velte chhinchhiah leh Identity Card pekchhuah hna hi tun May thla chhung ngei a zawhfel tum a ni a, Zirtawpni khan Task Group member-te leh District hrang hranga Nodal Officer-te chuan biakhmuhtheih hmangin an thlen chin tawhte inhrilhfiahin tun thla chhung ngei a zawhfel tawh an beisei thu an sawi a ni.

Myanmar-a sipaiin sawrkarna an pawnglak hnu leh sipai sawrkarna dodaltute umzui an nih avangin nikum March thla bul lam atang khan Mizoram-ah raltlan an lo lut tan a. Kumin January thla khan Task Group hi sawrkarin a din a, raltlante chhinchhiah a ID Card pekchhuah hna chu February thla chhunga zofel turin a bituk a. Mahse, COVID-19 hri leng a hluar thar leh avangin zawh hman a ni lova, hun pawhsei sak an ni.

Raltlan te hi khaw hrang hranga Relief Camp 155-a an awm bakah mahni chhungkhat laina leh thiante belte leh mahni a In luaha awmte an awm bawk a. Relief Camp-a awmte hi Official-ten luhchilha chhinchhiah leh Identity Card an siamsak hlan zel a harsat loh laiin, mimal In-a chengte leh In luahte dapchhuah hna erawh a hautak hle ni a thudawn a ni.