College Principal in thuthar thehdarhtute leng ah sawm

Govt. Serchhip College Principal PC. Lalremsiama chuan Serchhip-a thuthar thehdarhtute chu nimin khan College-a leng-ah sawmin he College hmasawnna hrang hrang an sawiho bakah hmasawn zelna turte an sawiho bawk.

Thuthar thehdarhtute nen an inkawmna ah hian College Principal chuan Govt. Serchhip College chu hun rei tak infrastructure lama hmasawnna kawngah a than a thu ang reng hle nia sawiin, an tlukpuia an ngaih Mizoram-a College dangte chuan an lehpel deuh vek tawh tih a sawi a, hetihlai hian hma-sawnna tlem tlem chu an nei ve zel tih sawiin, tunhnai ah Science Building chu sak zawh a nih thu a sawi a, amaherawhchu a chhunga Furniture siamna tur sum an la dawng lo tih sawiin, July ni 1-ah Class tan tur a nih avangin an rilru a hmanhmawh tawh hle tih a sawi a, Science block building hnuaia Gym an siam pawh zing leh tlai-ah chhawr tang-kaitu an thahnem hle tih a sawi bawk.

Hun rei tak sak tawh Girls Hostel chu luah theih tura an peihfel tep tawh thu pawh Principal chuan sawiin, Science Laboratory building an neih lai chu a têt tawh avangin zirlaiten hmun an inchan loh avangin a inchhawka hman a ngaih thu a sawi a, DoNER atangin Girls Hostel leh Ministry of Minority Affairs atangin Girls Recreation Centre sakna tur an dil mek thu pawh sawiin, an Campus kaltlanga Khawtetlang panna kawng chu khâr a nih theihna atan Diversion Road tur chu hun engemawchen an buaipui tawh thu leh Hockey Playground pawh siam tuma hma an lak mek thu a sawi bawk.

Heng bakah hian Govt. Serchhip College in tunhnaia hmasawnna a neih dang te pawh sawiin, zirna pangngai bakah NSS, NCC Army wing leh Air Wing te an neih thu a sawi a. Tunah hian Zirtirtu 49 an awm thu pawh sawiin, Minimum norms an phak lo hle tih a sawi bawk. He hunah hian College Campus-a hmalakna hrang hrangte pawh an thlirho nghal a ni.