COVID-19 hri kai enkawllai mi 135 la awm mek

Niminpiah khan Mizoram-ah Sample 219 enfiah leh niin heng atang hian COVID-19 hri kai mi 21 hmuhchhuah an ni a, nimin tlai thleng khan Mizoram-ah COVID-19 hri kai enkawllai mi 135 an awm a ni.

Niminpiah a Mizoram-a COVID-19 hri kai hmuhchhuah thar te hi Rapid Antigen Test hmanga Sample enfiah 211 atanga hmuh te vek an ni a, Aizawl District-ah 8, Lunglei District-ah 6, Serchhip District-ah 3 leh Kolasib, Mamit, Khawzawl leh Saitual District-ah mi pakhat theuh an ni. Heng bakah hian ZMC-a RT-PCR Laboratory-ah Sample 2 leh District hrang hranga TrueNat Laboratory-ah Sample 6 enfiah awmin COVID-19 hri kai hmuhchhuah an awm lo thung a ni.

Nimin khan Mizoram-ah COVID-19 hri kai enkawl dam mi 27 an awm belh ve leh bawk a, heti hian nimin tlai dar 5:00 thleng khan Mizoram-a COVID-19 hri kai hmuhchhuah tawh zawng zawng chu 2,28,226 niin an zinga 2,27,393 te chu enkawl dam an ni tawh a, hri kai hmuh tawh atanga chhutin za zela 99.64 te chu enkawl dam ni tawhin hri kai enkawllai 135 an la awm a, hri kai zingah mi 698 an boral tawh bawk.

Tun dinhmun ah District 11 zingah Siaha leh Lawngtlai tihloh District dang zawngah COVID-19 hri kai enkawllai an la awm a, Aizawl, Lunglei leh Saitual District-ah hri kai mi 10 aia tam enkawl an la ni.