State Civil Service te State hmasawnna leh hmalam hun atan an pawimawh tih hre thar turin chah

Rural Development Minister Lalruatkima chuan tate Civil Service te chu State hmasawnna leh hmalam hun atan pawimawhna thuk tak an nei tih hre thar leh turin a chah.

Mizoram-a Block Development Officer (BDO) te tana intuaitharna Training nimin-a State Institute of Rural Development/State Panchayat Resource Centre (SIRD&PR), Durtlang a neih a hmanpuina ah he thu hi sawiin RD Minister Lalruatkima chuan Sawrkarin Policy a duan te, Department hrang hrang kaltlanga hmachhawp a siam thin te hlawhtlinna atana thawktu chu sawrkar hnathawk te an ni tih sawiin, Sawrkar tha leh tha lo, chak leh chak lo neihna kawngah Policy leh Sawrkar kaldan tur tul ang duangtu Legislator te an pawimawh em em rualin a bawhzuitu sawkar hnathawk ten mawhphurhna sang tak in nei tih an hriat thar a duh thu a sawi a. Central sawrkarin Scheme hrang hrang a siam kalpui hnem ber chu Rural Development Department an nih thu pawh sawiin, Scheme hrang hrang an kalpui dan tur leh chumi atana hriatna tha zawk an neih theihna tur atana SIRD in Refresher Course an buatsaih chu a lawmawm a tih thu sawiin, an thil zir chu hmasawnna hna thawhna kawnga puitu tangkai tak a nih a beisei tih a sawi a ni.

RD Minister chuan BDO te chu mipui rawngbawltu an nih ang ngeia anmahni dawrtu apiang tana biak nuam leh hawihhawm ni turin a chah a. Sawrkar fawng vuantu apiangte tana thawhpui theih ni zel a, mipui tana rin ngam, sawrkar leh ram tana theihtawp chhuahtu, mi rinawm leh mi taima, ram tana fahrin manhla ni turin a fuih bawk a ni.

Ni 3 chhung awh tur BDO te tana Training-ah hian Sawrkar laipui scheme hrang hrang hriatzauna leh bihchianna hun hman a ni anga. Thupui thlanbik hmangin mi thiamten Mizoram chhunga Block 26 enkawltu BDO kalkhawmte hi an zirtir dawn a ni.

Comments

Popular posts from this blog