Serchhip District-ah Green Mizoram Day pualin thingtiak phun leh enkawl zui hna thawh tum a ni

Mizoram ti hring tura thingphun beihpui thlakna ni, Green Mizoram Day chu thla thar June 10 khian Serchhip District-ah pawh hman leh a ni dawn a, kum hmasa lama thing lo phun tawh te pawh enkawl zui tura ngenna siam a ni ang.


Kumin a Serchhip District-a Green Mizoram Day hman dan tur ngaihtuah hian nimin khan Serchhip DC Meeting Hall-ah District Level Committee on Green Mizoram chu an Chairman leh District Bawrhsap Nazuk Kumar IAS hovin an thukhawm a, he hunah hian Bawrhsap chuan hripui vangin Green Mizoram Day hi kum hnih chhung kan hmang mumal thei tawh lo tih sawiin, kumin ah erawh chuan mumal taka kan hman theih a beiseiawm tih sawiin, Serchhip District-ah pawh hlawk taka hman kan tum dawn a ni, a ti.

He hunah hian nikum lama Serchhip District-a Green Mizoram Day hman dan tarlan niin COVID-19 hri leng avangin mi sawmbik te nen Thenzawl-a Golf Course-ah hun hman niin hetah hian thingtiak 50 phun a ni a, heng zinga zaa 97 vel zet chu damkhawchhuakin sawrkar Department leh NGO bakah thingtiak phun duh dang pawl hrang hrang 78 te hnenah thingtiak phun hun chhungin thingtiak 5488 semchhuah a ni tih he hunah hian tarlan a ni bawk.

Nimin-a Meeting hian June 11-a hman thin Green Mizoram Day hi kumin ah Inrinni a nih avangin a hawnna inkhawm chu June 10, 2022 (Zirtawpni)-ah Thenzawl Golf Course-ah neih nise tiin a rel a. Thenzawl Golf Course hi a cheimawina lam ai mahin a sir kual vela leilung luangral thei venna atan leh a sira luang Vanva lui tuihna humhalh a nih theih nan a chhehvelah thingtiak phun tur a ni anga. A hawnna inkhawm hi zing dar 11:00-ah buatsaihin Golf Course chhehvel leh Thenzawl YMA Park-ah te thingphun hnatlang neih zui tur a ni ang. Hei bakah hian a tuk Inrinni-ah kum kalta lam sawrkar Office leh pawl hrang hrang ten khaw kar kawng leh hmun danga an lo phun tawhte samfaia a thi te ai phun thar lehna neih zui leh nise an ti. Hemi atan hian Department leh pawl hrang hrangte hnenah ngenna siam an rel bawk a ni.

He hunah hian Member Secretary leh Thenzawl DFO Lalbiakchama Chawngthu chuan kum hmasa lama hmalak tawhna te leh kumin atana State Level Committee in ruahmanna a siamte sawi zauna a nei a, kumin Green Mizoram Day thupui atan ‘Thing phun la, tuihna siam rawh’ tih chu thlan a ni.

Comments

Popular posts from this blog

Volleyball S/F khel dawn